Su Gazetinu, 17 de ghennàrgiu de su 2021

Su Gazetinu, 17 de ghennàrgiu de su 2021

Su Gazetinu

Allerta mèteu – Bentu e maretadas in Sardigna. Fintzas a is tres de custu mangianeddu balet s’allerta mèteu bogada dae s’Amparu tzivile regionale.

Arriscu de isfossonu in sa SS 131 DCN – In sa SS 131 DCN, in su deretu de Aidumajore, ddoe est s’arriscu de unu isfossonamentu. Pro cussu ant istabilèssidu de serrare una de is duas corsias andende cara a Abbasanta.

Sardigna zona groga – Dae oe intrat in vigèntzia su Dpcm nou contras de su coronavirus. Regordamus chi sa Sardigna dda cunsìderant zona in colore grogu e at a dèpere sighire, duncas, totu is disponimentos prevididos pro custa classificatzione. Regordamus fintzas chi est cunfirmadu su proibimentu de essire intra de is deghe de note e is chimbe de mangianu.

Torrant a abèrrere is museos – In Aristanis puru torrant a abèrrere is museos. Dae cras s’ant a pòdere visitare cun apuntamentu s’Antiquarium arborensu, sa Pinacoteca Carlo Contini, sa sala de istùdiu de s’Archìviu istòricu de su Comune e su Tzentru de documentatzione in contu de sa Sartìllia, gestidos dae sa Fundatzione Aristanis.

Vatzinos contras de su coronavirus – Non si firmat nemmancu oe sa faina de vatzinatzione contras de su coronavirus. S’Assl de Aristanis, cun is 906 doses noas arribadas, at a vatzinare fintzas su personale de s’ispidale de Bosa, de sa Clìnica de Aristanis e de su Poliambulatòriu de Aristanis. At a tocare, a pustis, a is residèntzias sanitàrias assistidas, cumentzende dae cussa de Milis.

Donatzione de su sàmbene – Regorta de sàmbene cuncordada dae s’Avis oe in Santeru (in ue ddoe at a èssere s’autoemoteca) e in Marrùbiu (in sa sea de sa setzione Avis). Chie bolet podet donare su sàmbene. Una faina de bonucoro chi non noghet e chi agiudat a Sardos meda chi nde tenent bisòngiu.

Domìnigu, 17 de ghennàrgiu de su 2021