Invia Contributo
Accedi o registrati per inviare notizie e segnalare eventi alla nostra redazione!
Accedi o registrati per inviare notizie e segnalare eventi alla nostra redazione!
Su Gazetinu, lunis 18 de martzu de su 2024
Sa Sardigna in Santu Frantziscu – Nòdida in totu su mundu pro is bellesas naturalìsticas suas, pro is màndigos e pro is richesas archeològicas suas, s’Ìsula nostra dae pagu tempus est isbarcada in Amèrica.
Difatis in Santu Frantziscu, una de is tzitades sìmbolu de sa Califòrnia, at abertu su Tzentru pro su Turismu de sa Regione Sardigna. Cuncordadu dae su Cunsòrtziu Industriale Provintziale Nord Est Sardigna-Gaddura (su CIPNES), a manos de pare cun sa sotziedade Primaidea, est unu logu nou in sa Jackson Street , in su coro de sa tzitade, chi at a permìtere a is bisitadores de iscobèrrere s’Ìsula.
Fraigadu in duos pranos de prus de 200 metros cuadrados, su Tzentru, gràtzias a sa realidade virtuale, promovet sa Sardigna, faghende-dda a connòschere a is turistas noos potentziales istràngios. “De su restu, segundu Forbes, sa Sardigna est “sa mègius destinatzione de biàgiu in su mundu pro su 2024”, at naradu sa Regione Sardigna. “Su Tzentru pro su Turismu est duncas un’ocasione pro contare sa cultura, su logu, su connotu e s’enogastronomia de sa terra nostra in una de is tzitades prus mannas de sa costera otzidentale de is Istados Aunidos”.
A intro si ddoe agatat un’aposentu immersivu, cun ischermos interativos, unu visore de generatzione ùrtima e unu logu dedicadu a is addòbios e a is mustras de coghina, a is tastaduras e a is cunferèntzias. Intra de is logos chi si podent bisitare a manera virtuale, ddoe sunt is caminos de sa fide, is logos archeològicos nuraghesos, is biddas de is cussòrgias de a intro, is costeras, is tzitades fundadas dae is tzivilidades mediterràneas antigas.
Ma su Tzentru pro su Turismu non tenet isceti sa punna de ofèrrere unu giru virtuale peri s’Ìsula: est fintzas s’ocasione pro fàghere iscobèrrere a is bisitadores e a is chi tenent interessu is produsimentos sardos, pro fàghere crèschere sa domanda intra de ristorantes e bendidores e fàghere a manera chi sa clientela pighet istima a is cosas bellas de s’ìsula. Is bisitadores, gràtzias a su Tzentru, ant a pòdere otènnere totu is informos chi serbint pro bìvere bene sa Sardigna comente a una destinatzione turìstica de giudu.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.