Sa Sardigna saludat sa nàschida de testùines marinas noas – Chentu testuineddas de Caretta caretta sunt imbàtidas a mare dae sa praja de Cristolaxedu, in Murera: de 104 oos agatados, bator ebbia non si sunt abertos. Una testuinedda, agatada debilitada meda, nche l’ant leada a su tzentru de
primu agiudu de s’Àrea Marina Protetta Capo Carbonara e l’ant liberada su sero matessi, a sas 23:30. S’interventu prontu de s’AMP e de su Corpus Forestale e de Vigilàntzia Ambientale at permìtidu de preservare su niu, agatadu su 9 de austu. Finas custa borta est istadu importante s’inditu de unu tzitadinu.
No est unu casu ùnicu. Su 4 de austu passadu una tostòine fèmina aiat seberadu sa praja de Foxi Manna, in marina de Tertenia, pro pònnere sos oos. Assora puru fiant istados unos cantos tzitadinos e turistas chi aiant alertadu sa Guàrdia Costiera de Arbatax, faghende ativare sos protocollos de sa
Retza regionale pro su mantenimentu de sa fàuna marina. B’est istadu s’interventu de forestales, marineris e personale de Forestas, chi ant serradu su logu.
Sos biòlogos de su Cres-Centro di recupero de su Sinis ant a monitorare su niu finas a cando s’ant a abèrrere sos oos, prus o mancu a
fine de istiu o a primos de atùngiu. S’istajone fiat comintzada su 6 de trìulas cun su primu niu documentadu in Colostrai, semper in comune de Murera. Sa Sardigna si cunfirmat de sos logos prus importantes in su Mediterràneu otzidentale pro sa riprodutzione de custos animales: chentinas de chilòmetros de costas cun prajas mannas bastante ìnnidas permitint a sas testùines fèminas de pònnere sos oos in logu adatu.
Custa particularidade faghet pensare chi carchi cria, in sos logos prus isulados, mancu si biet, e chi duncas su nùmeru reale de nios forsis est prus artu de cussu documentadu. In su 2025 sos nios registrados sunt istados prus de binti, su mègius resurtadu pro s’ìsula.
Gianfranca Piras
Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.
