Su Gazetinu, 25 de onniasantu de su 2022
Cumentzat oe in Aristanis sa de bator editziones de ChocoMoments, sa fiera de su tziculate artesanale. Sa manifestatzione dda cuncordant ocannu puru in pratza de Tzitade.
Su tziculate at a fàghere a curnisa in custas tres dies de festa. Oe e cras is paradas chi ant a acasagiare a is maistros tziculateris chi arribant dae totu Itàlia ant a abèrrere dae is 10.00 fintzas a is 23.30. Domìnigu, imbetzes, sa mustra mercadu at a serrare a is oto de sero.
Cun late, iscagiadore, insainetadu: onniunu podet tastare su tziculate chi bolet, segundu su gustu suo. In prus, at a fàghere a tastare su licore de tziculate, is cremas de tziculate bellas a frigare a subra de àteros màndigos, su tziculate callente e unu muntone de àteras licanias.
Ma a costàgiu de sa fiera de su tziculate ddoe at a àere fintzas una filera de àteros apuntamentos. Cumentzende dae su laboratòriu dedicadu a is pipios. Oe, cras e domìnigu a merie, dae is 15.30 a is 17.30, is pipios s’ant a pòdere furriare a tziculateris: a davantale, a capeddu e cun totu is trastos chi serbint, ant a imparare a traballare su durche chi naschet dae su sèmene de sa mata de su cacau. Cras e domìnigu a mangianu, imbetzes, dae is deghe de mangianu a mesudie, ant a fàghere unos cantos cursigheddos de arte durchera pro is mannos.
Ma ddoe at a àere fintzas mustras de su traballu de is maistros tziculateris. Cras a is ses de merie ant a cuncordare una tauledda de tziculate de record, longa 15 metros. A pustis ddoe at a àere una tastadura de tziculate gratis pro totu is gulosos presentes.
Domìnigu, imbetzes, semper a is ses de merie, is tziculateris ant a cuncordare durchigheddos de tziculate dedicados a sa tzitade de Aristanis, ponende ingredientes de logos nostros.
Custu apuntamentu de atòngiu ddu cuncordat sa sotziedade ChocoMoments, paris cun sa Pro Loco de Aristanis. Sa manifestatzione gosat de su patrotzìniu de su Comune de Aristanis.
Àteros informos s’agatant in sa pàgina Facebook “ChocoMoments Fabbrica del Cioccolato” e in su portale web contivigiadu dae is organizadores, chi s’agatat in s’indiritzu ChocoMoments.it .
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2021-2022 – L.R. 22/2018, art. 22.
commenta