Su Gazetinu, 28 de martzu de su 2021

Su Gazetinu, 28 de martzu de su 2021

Su Gazetinu

Aristanis, teatru Garau – Su Comune de Aristanis no at retzidu oferta peruna pro sa gestione de su teatru Garau. Sa Giunta comunale, chida chi benit, at a pensare a carchi manera pro torrare a abèrrere su fàbbricu, chi is traballos de acontzu sunt acanta de agabbare.

Santeru, amparu de is costeras – Su Comune de Santeru rispondet a is chèscias pro is traballos de amparu de is costeras. Paris cun is tècnicos chi ant progetadu sa faina, su sìndigu Luigi Tedeschi torrat a nàrrere chi su traballu, chi nd’at fatu pesare ataciadas fintzas in is chidas passadas, est fatu comente si tocat. Is pedras mannas carchinàrgias de Orosei, cun su tempus, ant a pigare su pròpiu colore de sa costera de rocas de S’Arena iscoada, in ue fatu fatu essint freaduras pro more de s’atzione de su mare.

Ilartzi, ispidale “Delogu” – In s’ispidale “Delogu” de Ilartzi amegant de ismenguare ancoras fainas e servìtzios, ma su Comitadu tzìvicu chi s’afatèriat pro ddu torrare a abbiatzare non si firmat. Eris at cuncordadu un’àtera manifestatzione de chèscia: dae is noe e mesu a mesudie is fèminas e is òmines de su Comitadu ant parchegiadu is veturas issoro in arburada Antonio Carta, in dae in antis de s’ispidale. Bàsciu de otènnere is rispostas chi s’abetant, su Comitadu at a cuncordare una manifestatzione ònnia mese.

Vatzinos – Die de vatzinatziones oe in Aristanis: 1200 antzianos ant retzidu s’avisu de andare a s’ispidale “Santu Martinu”, pro ddis fàghere su vatzinu contras de sa Covid-19.

Santa Justa, bonucoro – Sighit oe puru in Santa Justa sa faina de bonucoro cuncordada dae is pitzocheddas e pitzocheddos de sa Consulta de is giòvanos. Intra de is noeoras e sa una at a fàghere a portare in dae in antis de sa crèsia manna generes alimentares a iscadèntzia longa, ma fintzas prodùsidos pro su contivìgiu de sa persone, maschereddas chirùrgicas e gel disinfetadore. Totu su chi si regollet s’at a partzire intra de is famìllias bisongiosas de sa bidda oru oru de istàinu.

Domìnigu, 28 de martzu de su 2021