Vatzinos – Is sardos chi tenent prus de sessanta annos de edade s’ant a pòdere presentare a is tzentros de vatzinatzione prus de importu de Sardigna pro fàghere su vatzinu contras de su Coronavirus, mancari non si siant prenotados in antis. Dd’at apostivigadu sa Regione, chi chircat de illestrire is fainas de vatzinatzione a prus a prus a pustis chi si sunt iscobertos ritardos mannos e chi, pro custu, s’est chesciadu su cummissàriu pro s’emergèntzia Figliuolo.
Aristanesos protagonistas in is Olimpìades – S’isport de sa provìntzia de Aristanis amegat de bìvere unu momentu istòricu gràtzias a bator rapresentantes suos impignados in is Olimpìades. Ant a mòvere cara a Tokyo su canoteri Stefano Oppo, sa pallavolista Alessia Orro e su curridore Lorenzo Patta, a prus de su tècnicu federale Stefano Loddo impignadu in su setore de sa canoa.
Festas religiosas – Tocat a torrare a abbiatzare a lestru is festas religiosas de sa Sardigna. Unu cunfrontu pro custu intra de Regione e Crèsia sarda dd’ant apretadu is consigieris regionales de is Frades de Itàlia, e intra de issos su cabu-grupu e consigieri regionale de sa provìntzia de Aristanis Francesco Mura.
Ispidale de Sòrgono – Pro su 30 de trìulas si previdet in Nùgoro una manifestatzione manna de chèscia pro amparare s’ispidale de Sòrgono. Su Comitadu tzìvicu chi amegat de dda cuncordare at fatu un’apellu pro ddoe pigare parte fintzas a is amministradores e a sa populatzione de is biddas de Mandrolisai e de Barigadu.
Antoni Nàtziu Garau
—–
Attività realizzata col contributo della Regione Sardegna – IMPRENTAS 2020-2021. LR 22/2018, art. 22
commenta