Sàbadu, 25 de cabudanni de su 2021
Aristanis, furas in trasferta – A una giòvana bandulera de sa Croàtzia dd’at arrestada s’Iscuadra mòbile de sa Cuestura de Aristanis, chi at denuntziadu fintzas a un’àtera pitzoca. Segundu su chi nd’est essidu a pìgiu in is iscrucullos de sa Politzia, is duas fèminas s’istadiale passadu ant proadu a fàghere unas cantas furas in is apartamentos de su bighinadu de “Tzitade giardinu”. Fiant arribadas dae Livorno a màchina, ma – a su chi paret – sa punna de sa presèntzia issoro in Aristanis non fiat cussa de nche passare una pariga de dies de vacàntzia.
Atmosfera, in arribu una nue dae su vulcanu de is Canàrias – Sa nue de diòssidu de tzùrfuru bogada dae su vulcanu Cumbre Vieja, in s’ìsula de La Palma, in s’artzipèlagu de is Canàrias, at a arribare fintzas a Sardigna, segundu is previsiones de su Servìtziu europeu de càstiu de s’atmosfera, Copernicus.
Sa nue at a lòmpere a su Mediterràneu in custa coa de chida. Is espertos de Copernicus ant naradu chi “at a interessare su prus de s’Ispagna e is ìsulas Baleares, sa Frantza meridionale, sa Còrsica, sa Sardigna e sa Sitzìlia, una parte de s’Itàlia otzidentale e meridionale”.
Antoni Nàtziu Garau
—–
Attività realizzata col contributo della Regione Sardegna – IMPRENTAS 2020-2021. LR 22/2018, art. 22
commenta