Su Gazetinu, 5 de martzu de su 2021

Su Gazetinu, 5 de martzu de su 2021

Su Gazetinu

Vatzinos – Martis chi benit ant a cumentzare in provìntzia de Aristanis is vatzinatziones contras de sa Covid-19 de is tzitadinos chi tenent a su mancus 80 annos.

Is primos comunes interessados sunt cussos de Aristanis, Bauladu, Milis, Santeru, Tramatza e Tzeddiani. A pustis s’at a sighire, a tenore de sa disponibilidade de is vatzinos, cun is biddas de is àteros àmbitos vatzinales de sa provìntzia.

In ònnia comunu s’at a cuncordare unu Logu de vatzinatzione mòbile, in is locales chi is amministratziones comunales ant pònnere a disponimentu, in ue is operadores sanitàrios de sa Assl de Aristanis, cun is chi ddis narant iscuadras “boladoras”, ant a fàghere is vatzinos. In Aristanis ddos ant a fàghere in su Poliambulatòriu de bia de Pira.

Pro immoe a is tzitadinos chi tenent 80 annos o prus ddos at a tzerriare su personale de su Comune de residèntzia in sa die, in sa sea e a s’ora inditada dae s’Assl. A is persones chi non si podent transire dae domo pro chistiones de salude, pro ite mancari non podent caminare, ddas ant a vatzinare in domo etotu is operadores de su Servìtziu de igiene e sanidade pùblica.

In su Comune de Aristanis sa vatzinatzione at a sighire fintzas a cando s’ant a vatzinare totu is antzianos chi tenent 80 annos o prus. In is àteras biddas, imbetzes, sa vatzinatzione s’at a fàghere in una o duas dies, cunforma a su nùmeru de is persones chi bolent immunizadas.

Su Servìtziu de igiene e sanidade pùblica at tzerriadu fintzas a is sìndigos de Nurachi, Boàtiri e Marrùbiu, pro ddis pedire sa lista de is tzitadinos chi tenent a su mancus 80 annos.

Chenàbura, 5 de martzu de su 2021