Sighint is apuntamentos in s’Unitre
In s’Universidade de is tres edades de Aristanis si sighit a faeddare de archeologia.
Oe ddoe at a àere una letzione fata dae s’archeòlogu Alfonso Stiglitz e dae sa professora Francesca Ceci chi ant a faeddare de superstitzione, maia e ritos istrambos in Sardigna e in su mundu antigu. S’apuntamentu est pro is 16.30.
Totu is cunferèntzias si faghent in sa sea de s’UNITRE de pratza de is Boes, in su rugheri cun bia de Galilei.
Martis, su 21 de maju de su 2019
Su Gazetinu, lunis 6 de maju de su 2024
Adiconsum Sardigna e Consumerismo ponent in craru sa chistione de s’acabbu de su mercadu amparadu de s’energia elètrica – Sighit a nde fàghere pesare chèscias mannas e a pònnere pistighìngiu s’acabbu de su mercadu amparadu de s’energia elètrica, de tale manera chi su Parlamentu italianu at cunvocadu in auditzione s’Arera, s’Autoridade de regulatzione pro s’energia, is retzas e s’ambiente.
Custa auditzione naschet dae is sinnalatziones de Consumerismo e Adiconsum Sardigna, chi dae tempus meda si-nde incurant de sa chistione e ant bogadu una proposta noa: unu perlongamentu de tres meses pro presentare sa domanda pro su tramudu a s’amparu graduale. A s’imbesse de su chi si pensaiat a primìtzios, cun su tramudu deretu dae su mercadu amparadu a cussu lìberu, a is utentes ddis ant dadu sa possibilidade de gosare de s’amparu graduale, cun tarifas prus a baratu.
Sa pagu seguresa chi acumpàngiat s’acabbu de su mercadu amparadu, però, ingendrat pistighìngiu pro is assòtzios de is consumadores, chi diant bòlere ischire ite ddis at a acontèssere a is chi ant fatu domanda pro intrare a s’amparu graduale, ma chi no ant retzidu una cunfirma a intro de s’iscadèntzia de su 1 de trìulas.
“Cunsideradu chi su tempus tècnicu chi serbit pro fàghere su tramudu podet lòmpere fintzas a su 1 de cabudanni”, pregontant is duos assòtzios, “in custa simana is consumadores ant a pòdere gosare de is tarifas prus a baratu de s’amparu prus mannu o ant a dèpere pagare is tarifas prus caras de su frunidore chi tenent in su mercadu lìberu? Sigomente sunt milliones is italianos chi tenent dificultade in su intrare a Internet pro fàghere sa domanda, s’Istadu ddis at a assegurare agiudu e amparu?”.
Un’àtera chistione est sa chi pertocat is utèntzias noas. “Ite ddis at a acontèssere a is chi dae su 1 de trìulas ant a domandare un’utèntzia pro domo? Ant a dèpere seberare a mala bògia a unu frunidore de su mercadu lìberu o ant a pòdere gosare de is tarifas de s’amparu graduale?”, atzunghent is assòtzios. “Cun s’acabbu de su mercadu amparadu, difatis, si podet pensare a manera discansosa un’incarimentu de is tarifas. Ite pensat de fàghere s’Autoridade pro parare fronte a custa punna chi si podet prevìdere?”.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
commenta