Su Gazetinu, lunis 25 de martzu de su 2024
In Sardigna nche at pagos traballadores cualificados – In Sardigna puru is traballadores cualificados sunt malos a agatare: mancant prus de 8.000 figuras pro is impresas artesanas sardas e su 21,4% de is giòvanos no est ativu. Ocannu passadu, is impresas sardas non nche sunt resessidas a agatare su 42% de sa manodòpera chi serbiat, est a nàrrere chi sunt abarrados bòidos 64.170 postos de traballu. Is siendas piticheddas, imbetzes, ant tentu dificultades mannas pro pigare a su 42,9% de su personale (48.030 traballadores), mentras pro is artesanos su nùmeru de is traballadores malos a agatare est lòmpidu a su 50,7% (8.170 traballadores).
Custos sunt is nùmeros bogados dae s’Ufìtziu pro is Istùdios de Confartesania Sardigna, impreende is datos de UnionCamere-Anpal-Excelsior 2023.
Su ritardu in su agatare a is persones chi bisòngiant ingendrat ispesas mannas: in siendas sardas piticheddas is datos prus friscos narant prus de 206 milliones de èuros. Sende custa sa situatzione, duas impresas piticheddas ònnia tres (su 66,0%) ant cungiminadu carchi interventu pro fàghere su tziri-tziri a su personale cualificadu chi ddis bisòngiat e/o pro fàghere a manera de non nche pèrdere su chi teniant giai.
“Is motivos prus de importu de custa situatzione sunt s crisi demogràfica, ingendrada pro ite ca is sardos faghent semper prus pagu fìgios e dae s’imbetzamentu, e su caminu de is istùdios: su 12% de is candidados non tenet una preparatzione e una formatzione bastante, mentras pro agiomai su 30% de is postos a disponimentu non s’agatant, o si-nde agatant pagu e a turmentu, is traballadores chi serbint”, narat su presidente de Confartesania Impresas Sardigna, Fabio Mereu. “In prus, ddoe sunt is giòvanos chi non sunt ativos, su 21,4% de is pitzocos intra de 14 e 29 annos, est a nàrrere giòvanos chi no istùdiant e non sunt disponìbiles pro traballare, pro chistiones de famìllia, pro iscoragimentu in sa chirca de su traballu, pro ritardu in is istùdios de s’universidade, pro more de agiudos pùblicos. E, si cumprendet, ddoe est fintzas su traballu a martinica”.
Pro prenare sa diferèntzia intra de domanda e oferta de traballu, semper segundu Confartesania Impresas Sardigna, diat tocare de mòvere duncas dae s’iscola, chi depet imparare a is giòvanos sa “cultura de su traballu”.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
commenta