Su Gazetinu, martis 7 de nadale de su 2021
Una die de istuda, a su mancus in parte, oe in Sardigna, bèsperu de sa festa de sa Gloriosa, a pustis de s’undada de frius, bentu e abba de eris chi at ingendradu istorbos mannos.
Nudda abba, segundu is previsiones de Arpa Sardigna. Oe su chelu est annuadu e is temperaduras diant dèpere crèschere unu pagheddu. Su bentu at a tirare dèbile o pàsidu comente a bentu estru (dae nord-ovest), in afortiamentu in is costeras otzidentales fintzas a mangianeddu.
Cras, imbetzes, is aeras ant a èssere annuadas, cun proiduras isuladas, fintzas cun piessignu de isderrocada de abba o temporada.
Eris, comente amegaiamus de nàrrere, sunt acontèssidos istorbos mannos in unas cantas cussòrgias de Sardigna. In Monteferru ddoe at istadu un’isfossonu acanta de s’ispèndula de Sos Molinos, chi nd’at fatu rùere a sa bia provintziale 15 intra de Santu Lussurzu e Bonàrcadu unu muntone de ludu e pedra.
In provìntzia de Nùgoro e in una parte de sa provìntzia de Tàtari, imbetzes, ant dèpidu fàghere is contos cun su nie e cun s’àstragu.
In sa bia istatale 389 Nùgoro-Lanusè tràficu firmu acanta de de Mamujada, pro more de unu mezu grae chi s’est postu de traessu in sa bia cando fiat niende meda.
In Burgos, in cussòrgia Pranu Mannu, is Vìgiles de su fogu de su Cumandu de Tàtari sunt intervènnidos pro un’intzidente istradale: una vetura est essida foras de carrera pro more de s’àstragu e si nch’est furriada.
Antoni Nàtziu Garau
—–
Attività realizzata col contributo della Regione Sardegna – IMPRENTAS 2020-2021. LR 22/2018, art. 22
commenta