Giòbia, 7 de santugaine de su 2021
Droga, un’arrestu e un’issucutu mannu de marijuana – Su giùighe at cunfirmadu s’arrestu pro su giòvanu de 32 annos firmadu eris in Marrùbiu in sa faina de s’Iscuadra mòbile de sa Politzia de Aristanis chi at permìtidu fintzas de nde issucutare una cantidade manna de marijuana.
Est unu pastore sena de pretzedentes penales, originàriu de sa provìntzia de Nùgoro, chi dd’ant agatadu prus de unu cuintale e mesu de istupefatzente, partzidu in trinta sacos prenos prenos de marijuana giai isbutonada e pulida de is partes chi non serbint (110 chilos).
In prus, su pastore teniat àteros bator sacos mannos cun cambos de sa pròpia mata ancoras cun is frores sena de isbutonare (50 kg).
Intrada chi esseret in su mercadu, sa marijuana issucutada diat àere fatu incungiare prus de 500.000 mìgia èuros.
Is iscrucullos de sa Politzia sighint e pertocant totu su Campidanu de Terraba. A parre de s’Iscuadra mòbile sa marijuana issucutada arribat dae prantaduras diferentes, chi ancoras non ddas ant iscobertas. Est capatzu chi in sa faina de coltivu e bèndida de sa droga su pastore non siat istadu a sa sola.
Fogu in su Sinis – Eris a merie unu fogu at brusiadu binti ètaros in su Sinis. Su fogu s’est ispartu in presse ispintu dae su bentu forte. Nde dd’ant istudadu unas cantas iscuadras de istudadores cun mezos de terra, cun s’agiudu fintzas de un’elicòteru.
Antoni Nàtziu Garau
—–
Attività realizzata col contributo della Regione Sardegna – IMPRENTAS 2020-2021. LR 22/2018, art. 22
commenta