Martis, 28 de cabudanni de su 2021
Aristanis, su tzentru pro is vatzinos ismènguat s’oràriu de abertura – Dae lunis de chida chi benit, 4 de santugaine, su tzentru pro is vatzinos de Sa Rodia in Aristanis at a abèrrere a merie duas borta isceti: su martis e sa giòbia, dae is tres a is chimbe (e non fintzas a is ses, comente fiat in antis).
Su lunis, su mèrcuris e sa chenàbura, imbetzes, su tzentru at a abèrrere a mangianu isceti, dae is noe oras a sa una. Su sàbadu e su domìnigu su tzentru at a abarrare serradu.
Esertzitatziones in Cabu Frasca – Esertzitatziones militares noas cun fainas de tiru in su polìgonu militare de Cabu Frasca. Dae su 4 a su 22 de santugaine, dae su lunis a sa chenàbura, is esertzitatziones s’ant a fàghere intra de is 7.30 e is 17.30. Sa Capitaneria de portu de Aristanis, duncas, cun un’ordinàntzia firmada dae su cumandante Matteo Gragnani, at apostivigadu is proibimentos chi pertocant su tretu de mare e de terra chi ddi narant “Nuova Tango 812”.
In is dies e in is oras in ue sunt in programma is fainas de su polìgonu, in cussu tretu de costera e de mare sunt proibidos sa navigatzione e sa firmada cun naves e/o àteras barcas de cale si siat genia, sa pisca e totu is fainas ligadas a sa pisca, su turismu nàuticu, sa balneatzione e totu is àteras fainas ligadas a is impreos pùblicos de su mare e de is prajas.
Campione de artziadura de pesos – Sergio Massidda est su campione europeu nou de artziadura de pesos Juniores in sa categoria fintzas a 61 chilos. S’atleta de Ilartzi, giai duas bortas campione de su mundu Juniores, in su 2019 e in su 2021, at conchistadu su tìtulu continentale in Rovaniemi, in Finlàndia, ponende-si in s’iscaleri prus artu de su palcu siat in s’artziadura de su bilantzeri a unu tempus isceti, siat in s’artziadura a duos tempos.
Antoni Nàtziu Garau
—–
Attività realizzata col contributo della Regione Sardegna – IMPRENTAS 2020-2021. LR 22/2018, art. 22
commenta