Su Gazetinu, martis 14 de cabudanni de su 2021
Mezos noos pro is istudiantes chi biàgiant – Is istudiantes de sa provìntzia de Aristanis chi biàgiant ant a tènnere a disponimentu bintunu mezos noos pro lòmpere a is iscolas issoro. Ant a èssere mezos de s’Arst, de Trenitalia e de unas cantas siendas privadas chi si nde incurant de trasportos. Sa Regione at pigadu su determinu de si carrigare de custu impignu, gràtzias a is domandas de su territòriu chi nde sunt essidas a pìgiu in s’addòbiu cuncordadu dae sa Prefetura de Aristanis e a ue ddoe ant pigadu parte is entes locales, is rapresentantes de is iscolas e cussos de su setore de is trasportos.
Prontu sucursu de Aristanis, mèigos a pesone – Pro transire s’arriscu chi su Prontu sucursu de Aristanis serret si pensat de pigare mèigos a pesone. Est s’idea bogada dae su diretore de is servìtzios de is ispidales de s’Assl aristanesa, Sergio Pili, cunsiderada sa mancàntzia de mèigos chi amegat de ingendrare istorbos mannos. Fintzas eris ant dèpidu tzerriare a unos cantos mèigos imprestados dae àteros repartos de s’ispidale.
Ancoras fainas malas de is furuncos in is prajas de su Sinis – Àtera fura (sa de tres) in tretu de pagas dies dae s’ùrtima acontèssida a dannu de is turistas chi ancoras sunt presentes in is prajas crabarissas. Is ùrtimos chi ddis est tocadu a connòschere sa faina mala sunt una pariga de turistas frantzesos, chi ant agatadu is veturas issoro isbòidas e – a dolu mannu – sunt abarrados fintzas sena de bestimenta. Ant annuntziadu una lìtera de chèscia chi ant a mandare a su Comune de Crabas e ant giai naradu chi no ant a torrare prus a Sardigna. Giai me in is chidas passadas fiant acontèssidas fainas malas che a custa, semper in is parchègios de is prajas de Crabas.
Antoni Nàtziu Garau
—–
Attività realizzata col contributo della Regione Sardegna – IMPRENTAS 2020-2021. LR 22/2018, art. 22
commenta