Su Gazetinu, chenàbura 3 de cabudanni de su 2021
Samugheo, iscolas – A pustis de duos annos de burocratzia, a intro de s’agabbu de ocannu ant a apaltare is traballos pro torrare a cualificare e ammanniare is iscolas de Samugheo. Su progetu faghet parte de Iscol@, su pranu istraordinàriu pro s’edilìtzia de iscola cuncordadu dae sa Regione.
Su progetu previdet de aunire in unu fàbbricu isceti s’iscola primària e cussa segundària e s’ammanniamentu de is logos pro is fainas didàticas e de sa sala mensa. In foras ant a cuncordare giardinos birdes, una palestra noa e campos noos de fùbalu e de tennis. Su fàbbricu nou s’at a aunire a su fàbbricu de sa cantina sotziale betza, in ue s’ant a fàghere àteras fainas didàticas e laboratòrios.
Marrùbiu, Iscola de mùsica “Alessandra Saba” – Creschet su nùmeru de iscritos a s’Iscola tzìvica de mùsica “Alessandra Saba”. S’istitutzione chi ponet paris biddas meda de su Campidanu de Terraba, de sa Parte Montis e de sa Marmidda Arta e chi tenet sa sea sua in Marrùbiu ocannu at a contare 460 dischentes. S’incarreru de is letziones si previdet pro lunis 25 de santugaine, in totu is seas. Su diretore Andrea Piras at annuntziadu pro s’annu de iscola chi benit su cuncordu de duos cursos ispetziales de perfetzionamentu in su mese de nadale e sa còmpora de istrumentos noos.
Aristanis, isparessent is impèigos architetònicos in una parte de sa tzitade – Su Comune de Aristanis at agiudicadu s’apaltu de is traballos pro nche bogare is impèigos architetònicos presentes in is bias e pratzas de una parte de sa tzitade. Is traballos ddos at a fàghere s’impresa Ocram Costruzioni de Boàtiri. Is fainas ant a pertocare a manera particulare is camineras de is bighinados de sa tzitade intra de s’ispidale, sa clìnica “Nostra Sennora de su Remèdiu”, su tribunale e unas cantas iscolas.
Antoni Nàtziu Garau
—–
Attività realizzata col contributo della Regione Sardegna – IMPRENTAS 2020-2021. LR 22/2018, art. 22
commenta