Eventos meda in sa coa de chida in s’Ìsula – S’atùngiu nde batit una coa de chida prena de oportunidades pro connòschere sa Sardigna peri sas biddas suas, sas traditziones e sos produtos de su territòriu.
Est torra protagonista sa traditzione: cras e domìniga “Atùngiu in Barbàgia” firmat in Gavoi, Lollove, Onanie e Tonara cun mustras, bìsitas acumpangiadas, cuntzertos e assàgios de màndigos.
In zona de Casteddu, custa domìniga Sìnnia at destinadu una die intrea a s’isport cun “Sportivamente”. Dae mangianu sa pratza de Santu Sidore at a ospitare provas, esibitziones e ispetàculos de disciplinas diferentes, paris cun mùsica, intratenimentu e serada musicale cun dj.
Sa fide est protagonista in Biddesorris dae cras finas a martis cun sa festa de Santa Vitàlia, e in Sàdili finint cras sas festas pro Santu Valentinu Màrtire.
Finas sa zona de Aristanis proponet una coa de chida prena. In Simaghis torrat sa Sagra de s’Arrosu, imbàtida a sa de 32 editziones, cun duas dies dedicadas a unu de sos produtos agrìculos tìpicos de su Campidanu. In Abas torrant a mòvere sos “Sentieri d’Arci”, Boàtiri festat sa Garnatza cun su Wine Fest e domìniga òspitat sa passigiada solidale “Walk for the cure”. In Fenosu pro sas Dies FAI de Atùngiu si podet bisitare sa base de vigilàntzia contra de sos fogos, e sas Dies de su Romànicu dant sa possibilidade de connòschere logos sacros e crèsias de Bonàrcado, Bilartzi, Masuddas e finas foras dae provìntzia, in Òschiri. In Paulle, in su parcu archeològicu de Santa Cristina, campu lìberu a “Ozu in Brocca” dedicadu a s’ògiu e a s’oleicoltura, e intro de bidda comintzat “Trame d’Autunno”. In Aristanis, in ùrtimu, cultura e ispetàculu andant paris cun s’eventu finale de sa mustra dedicada a Nobuyoshi Araki, sa Sagra de su Mustatzolu e de sa Garnatza cun Uccio De Santis, Giovanni Cacioppo e Gianluca Impastato, sa passigiada in bitzicleta “PedaliAmo per la Vita” e, domìniga sero, su cuntzertu de su Trio Lanzini in su Museu Diotzesanu Arborense.
Gianfranca Piras
Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.
