Sa Sardigna sùperat sa prova de Goletta Verde. Su report de Legambiente – Su mare de Sardigna promòvidu dae sa relata de Goletta Verde. Su programma de istiu de Legambiente, arribadu a sa de 40 editziones, at monitoradu 28 puntos in sas costeras de s’Ìsula intre su 14 e su 24 de trìulas: 25 campiones sunt resurtados in intro de sos lìmites de lege mentres 3 ant bogadu a campu crititzidades pro sa presèntzia de cuntaminatzione micro-biològica. Sos controllos los ant fatos in tretos de mare e in currispundèntzia de isbocos de frùmenes e de canales, cun anàlisi in contu de enterococchi intestinales e Escherichia coli.
Sas foghes sunt su puntu dèbile: totu sos campiones chi sunt resurtados foras dae sos lìmites pertocant rios e frùmenes. Duos sunt istados classificados comente “incuinados meda”: sa foghe de su Riu Foxi in Cuartu Sant’Aleni e sa foghe Sos Palones, in localidade Santu Giuanne in Pasada. Su de tres puntos, in sa foghe de su Riu Mannu in Portixeddu, in territòriu de Frùmini Majori, est istadu giudicadu “incuinadu”.
Bonas cunditziones in provìntzia de Aristanis, in ue sos chimbe puntos monitorados ant superadu su controllu. Sunt resurtados in intro de sos lìmites sa bessida a mare de s’istagnu S’Ena Arrùbia in Arborea, sa foghe de su frùmene Temo in Bosa, sa praja de Santu Giuanne de Sinis in Crabas, S’Architu in Cùglieri e sa bessida de su frùmene Tirsu in Turre Manna.
No ant agatadu peruna crititzidade in sos àteros territòrios de sas costeras de s’Ìsula.
Sos campionamentos ant dadu èsitos bonos in Gallura, in zona de Tàtari, in Ogiastra e in su Sud Sardigna, cun controllos fatos in carchi localidade balneare de cussas frecuentadas meda, comente su Poeto, Calamosca, Santa Maria Navarrese, Rena Bianca, Isola Rossa e Torre dei Corsari.
Legambiente marcat su megioru de sa calidade de sas abbas sardas, ma ammentat su bisòngiu de investire in sa depuratzione. Su monitoràgiu at interessadu fintzas s’Universidade de Casteddu e sos istudiantes de Ingegneria ambientale.
Maria Giovanna Serchisu
Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.
