In evidenza:
Su Gazetinu, lunis 17 de làmpadas de su 2024
Mancant traballadores in su setore edile – In Sardigna mancant 9.000 traballadores in su setore de s’edilìtzia: difatis, non s’agatant operajos e maistros cualificados. S’allarme dd’at bogadu sa CNA, s’organizatzione de categoria chi at presentadu una relata aprofundida in contu de su setore de is fràigos in s’Ìsula nostra.
Segundu is datos frunidos dae sa Cna, de custos 9.000 traballadores chi mancant, sa bellesa de 1.900 diant serbire pro remplasare a is chi andant in pensione in is meses imbenientes, ma fintzas a is chi sunt in mobilidade.
“Sa chistione de is traballadores chi mancant est una crititzidade manna”, narant su segretàriu regionale e su presidente regionale de Cna-Fràigos, Francesco Porcu e Antonello Mascia. “Non s’agatant operajos, diat serbire a torrare a pensare a s’organizatzione de su sistema de sa formatzione professionale e a cussu educadore a manera generale. Is chi s’agatamus in dae in antis sunt isfidas de importu. Bisòngiat de fàghere arribare manodòpera dae foras de Sardigna, cun polìticas de integratzione e formatzione”.
Cunforma a su 2019, sa provìntzia de Aristanis contat unu +43% in su mercadu de is fràigos, tiradu dae is infrastruturas e dae su fràigu de is domos. Est su datu prus artu in s’Ìsula, a pustis de su +46% de Nùgoro, gràtzias a is investimentos in infrastruturas. Sighit Tàtari cun unu +41%, ispinta dae su residentziale pro ddoe bìvere e, in fines, Casteddu e su Sud de Sardigna cun unu +33,7%.
Imbetzes, su 48% de su produsimentu est in Casteddu e in su Sud de Sardigna, cun 3,8 milliardos. A pustis ddoe est Tàtari cun 2,6 milliardos e su 33,00% de su totale. In fines, Nùgoro e Aristanis si partzint is cuotas chi abarrant, cun 910 e 640 milliones peròmine.
In custu cuadru, su setore de is fràigos in Sardigna sighit sa punna bella dae su 2023, mancari si cumentzent a bìere is primos sinnales de ismèngua, pro more de sa pagu seguresa geopolìtica mundiale, paris cun s’impeoramentu de is cunditziones de mercadu e cun s’ismèngua de is contributos pro is acontzos e pro is cualificatziones noas.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
