Martis, 15 de làmpadas de su 2021
Su Gazetinu
Progetos pro Arborea – In Arborea s’at a cuncordare unu progetu-ghia pro agiudare is siendas de su setore de s’agroindùstria. Dd’at asseguradu su ministru de is Polìticas agrìculas Alfredo Patuanelli chi eris at bisitadu Arborea paris cun sa vitze-ministra de s’Isvilupu econòmicu Alessandra Todde. Sa vitze-ministra dae parte sua at annuntziadu chi at a ghetare una manu de agiudu a su pranu propostu dae sa 3 A pro su fràigu de un’impiantu chi produet biometanu dae s’àliga de is siendas zootècnicas.
Aristanis, torrat a abèrrere su tzìnema Ariston – Lunis chi benit 21 de làmpadas at a torrare a abèrrere su tzìnema Ariston, a pustis chi fiat serradu prus de un’annu pro more de s’emergèntzia Coronavirus. In is primas tres dies ant a fàghere un’ispetàculu isceti, cun intrada gratis. In programmatzione ddoe sunt duos film prodùsidos in Sardigna.
Crabas, tunda – In Crabas sunt cumentzados is traballos pro fraigare sa tunda provisòria chi diat dèpere permìtere de fàghere isparèssere su rugheri perigulosu cun sa bia provintziale chi portat cara a mare, in su Sinis. Sa tunda dd’ant a agabbare in binti dies.
Prèmiu Spano a Fordongianus – Su prèmiu “Giarr’e Janas”, cuncordadu pro avalorare s’òpera de s’iscritore e polìticu de Biddaxidru Salvator Angelo Spano, dd’at bintu una laureada de Fordongianus. Ddi narant Sara Olla e at dedicadu sa tesi de sa de duas làureas chi tenet a un’istùdiu in contu de unu manuscritu de Spano non publicadu.
Antoni Nàtziu Garau
—–
Attività realizzata col contributo della Regione Sardegna – IMPRENTAS 2020-2021. LR 22/2018, art. 22
commenta