Su Gazetinu, 22 de abrile de su 2021

Su Gazetinu

Su Gazetinu OK

Su Gazetinu, 22 de abrile de su 2021

Su Gazetinu

Marrùbiu, su de tres mortos pro more de sa Covid-19 – In Marrùbiu si contat su de tres mortos pro more de su Coronavirus. Est una fèmina de sessanta annos chi fiat ricoverada in s’ispidale.

Santa Justa, fura de carburante – A duos giòvanos de Santa Justa ddos ant denuntziados a pustis chi ddos aiant filmados is telecàmeras de videumiramentu isboidende is serbatòios de is càmion chi nde retirant s’àliga in Aristanis. Is duos giòvanos tenent unos cantos pretzedentes penales.

Carrotzeri denuntziadu – In Marrùbiu su Corpus forestale at denuntziadu a unu carrotzeri pro ite ca nche at fuliadu in su sartu de sa bidda unos cantos pararaghe betzos de màchina. Arriscat addiritura s’arrestu o una contraventzione fintzas a 26 mìgia èuros.

Vatzinos, un’agiudu dae is Carabineris – Is Carabineris ant a agiudare a is antzianos chi ancoras no ant fatu su vatzinu contras de su Coronavirus. Ddis ant a frunire s’assistèntzia pro fàghere sa prenotatzione.

Ula, chentenària – Festa manna in Ula pro sa chentenària noa. Ddi narant Giovanna Maria Sanna. Tzia Giovanna Maria at pigadu parte a sa missa chi ant fatu in sa crèsia de Sant’Andria.

Giòbia, 22 de abrile de su 2021

Antoni Nàtziu Garau

—-

Attività realizzata col contributo della Regione Sardegna – IMPRENTAS 2020-2021. LR 22/2018, art. 22

commenta

Tutte le notizie

Su Gazetinu, mèrcuris 24 de abrile de su 2024

Su Gazetinu, mèrcuris 24 de abrile de su 2024

Dae su beranu a s’atòngiu, in cumpangia de Monumentos Abertos – Dae su mese de maju fintzas a su mese de santugaine, 76 intra de tzitades e biddas de Sardigna, cun s’atzunta de Bitonto, in Pùllia, e de Ferrara, in Emìlia Romànnia, ant a abèrrere is ghennas de is monumentos issoro. Monumentos Abertos at a propònnere ocannu puru unu biàgiu longu pro iscobèrrere unos cantos benes culturales e naturales sardos e italianos. Su tema seberadu pro sa de XXVIII editziones de sa manifestatzione cuncordada dae s’assòtziu Imago Mundi est “Logos pro is bisos”, movende dae su connotu e castiende a su tempus benidore.

Pro custa ocasione s’ant a pòdere bisitare prus de 800 monumentos, balende-si de s’acumpangiamentu e de is contos de agiomai 20.000 istudiantes e voluntàrios.

S’at a cumentzare sàbadu 4 e domìnigu 5 de maju dae Nurachi, Portu Turre, Cuartu Sant’Aleni, Samassi, Santu ‘Èngiu, Tàtari e Sant’Antiogu. E s’at a acabbare in Casteddu, sàbadu 26 e domìnigu 27 de santugaine.

In mesu ddoe sunt Aristanis, s’11 e su 12 de maju, e S’Alighera, su 18 e su 19 de maju, Terranoa, su 25 e su 26 de maju. Is duos apuntamentos foras dae s’ìsula s’ant a fàghere in atòngiu, su 12 e su 13 de santugaine, in Bitonto, e su 19 e su 20 de santugaine, in Ferrara.

“Semus acostende a is primos 30 annos de vida de Monumentos Abertos”, narat su presidente de s’assòtziu Imago Mundi, Massimiliano Messina. “S’editzione de su 2024 dda bolemus dedicare a Linetta Serri, chi est istada pro unos deghe annos una colunna pro s’assòtziu nostru. Un’esempru pro totus, chi amus a sighire de seguru. In dae in antis de una pèrdida aici manna, Monumentos Abertos in su 2024 creschet: difatis, in Sardigna nche tenimus prus amministratziones comunales chi pigant parte a sa retza, intradas noas, dae su Cabu de Susu a su Cabu de Giosso, comente a Alzachena o Nurachi, Lungoni o Nuxis, pro nde remonare una pariga, paris cun sa torrada de tzitades de importu, comente a Terranoa e Tèmpiu. E custu bolet nàrrere prus iscolas, prus assòtzios culturales, prus istudiantes e voluntàrios impignados, prus comunidades. Un’ispera bona pro su tempus benidore”.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.