Su Gazetinu, 21 de abrile de su 2021

Su Gazetinu

Su Gazetinu OK

Su Gazetinu, 21 de abrile de su 2021

Su Gazetinu

Elicòteru in Fenosu – Sa base aèrea de Fenosu de su Corpus forestale at a acasagiare un’elicòteru a totu annu. Ddu previdet su cuntratu nou chi sa Regione at firmadu pro assegurare una flota aèrea comente di tocat pro dd’impreare in sa gherra contra de su fogu in is tres annos 2021-2023.

Bosa, un’àteru mortu pro more de sa Covid-19 – In Bosa, in tretu de tres dies, contant un’àteru mortu pro more de su Coronavirus. Dae su cumentzu de sa pandemia is mortos sunt 18. Custu ùrtimu mortu est una pensionada chi fiat ricoverada in s’ispidale.

Su sìndigu Casula at fatu a ischire fintzas de un’ampulada noa de su nùmeru de is positivos (65) e at domandadu s’impignu de totus pro firmare s’isparghidura de su virus.

Aristanis, assessora noa – Un’assessora noa est intrada in sa Giunta comunale de Aristanis. Est Marcella Sotgiu e dd’ant assignadu unas cantas dèlegas, intra de custas cussa de su cummèrtziu. Sotgiu, inditada dae Forza Italia, est dirigente de su sindacadu Federpreziosi de Confcummèrtziu e est istada presidente de su Tzentru cummertziale naturale de Aristanis.

Bonàrcadu, chentenària – Bonàrcadu at afestadu is 102 annos de tzia Emilia Pisanu, sa prus betza de sa bidda de Monteferru.

Mèrcuris, 21 de abrile de su 2021

Antoni Nàtziu Garau

—-

Attività realizzata col contributo della Regione Sardegna – IMPRENTAS 2020-2021. LR 22/2018, art. 22

commenta

Tutte le notizie

Su Gazetinu, martis 14 de maju de su 2024

Su Gazetinu, martis 14 de maju de su 2024

Tocat de donare atentu a is tramperis – De is proas de trampa in lìnia a dannu de tzitadinos e impresas oramai si-nde intendet onni die: intra de mail, intimas e pàginas Internet farsas, a dolu mannu est semper prus difìtzile a non nche rùere. Pro cussu Poste Italiane at publicadu unos cantos cussìgios utilosos.

Sa sienda e is bancas non pregontant mai is datos riservados, comente a su nùmene de s’utèntzia, sa password e còdighes de seguresa cun e-mail, sms, chat social network e operadores de is tzentros telefònicos, e pro resone peruna.

Si calicunu, mancari si presentet comente a unu dipendente de sa sienda o a unu rapresentante de is Fortzas de s’òrdine, bos pregontat custos informos, de seguru est unu tramperi, duncas non tocat a ddos dare a nemos.

In prus, nemos domandat pagamentas de genia peruna cun s’iscusa de problemas de seguresa in su contu o in sa carta, nen cun inditos dados cun su telèfonu dae gente chi narat de èssere dipendente de sa Posta o unu rapresentante de is Fortzas de s’òrdine, chi consìgiant de andare a sa Posta o a s’isportellu ATM Postamat pro fàghere is versamentos.

Est de importu a non rispòndere a e-mail, sms, telefonadas o chat in ue si domandant is còdighes personales o in ue si sinnalant problemas de seguresa de fantasia cun sa minetza de sa firmada de su funtzionamentu de su contu.

Tocat de averiguare bene sa credibilidade de un’e-mail in antis de dd’abèrrere e tocat de castiare si su mandadore est giai connotu e si si podet identificare o nono; non tocat mai de nde iscarrigare is alliongiados de unu messàgiu suspetu ne a incarcare in is ligòngios chi si proponent. Si pro una faddina acontesset custu, tocat de non s’identificare in sa pàgina chi s’aberit e a serrare luegos su browser chi semus impreende pro sa navigatzione.

Pro pòdere intrare a sa pàgina Internet de Poste Italiane est mègius a digitare www.poste.it in sa traessa de chirca de su browser, pro evitare de nche rùere in pàginas farsas. Si si pensat de èssere in dae in antis de una proa de trampa, tocat de sinnalare luegos a Poste Italiane is e-mail o is àteros messàgios chi si parent suspetos.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.