MARIA SCANU

Su Gazetinu, mèrcuris 22 de maju de su 2024

Su Prèmiu In/Architetura in Sardigna – Sunt oto is òperas de s’Ìsula chi ant otentu su reconnoschimentu pretziadu de su Prèmiu regionale In/Architetura pro is tres annos 2023-2026.

Is categorias in gara fiant duas, est a nàrrere is fràigos noos e is cualificatziones noas. Pro sa prima setzione ant premiadu s’Hospice Nostra Sennora de Fàtima de Sètimu, progetada dae s’istùdiu de Mario Cubeddu; sa Sala Paesàgiu de su Museu tzìvicu “Giovanni Marongiu” de Crabas, progetada dae Dejana Fiamma; e s’istrutura pùblica chi faghet umbra de Biddanoa de Forru, intitulada “Umbra Noa”, progetada dae s’architetu Roberto Virdis.

Is fainas de cualificatzione noa premiadas sunt imbetzes sa Domo Museu Cannas (Camuc) de Ulassa; su Museu ispartu de arte MacLula de Lùvula; s’osservatòriu de is zonas ùmidas chi s’agatat in sa turre de Marceddì; s’ostellu Henry Buggerru de Buggerru; e sa crèsia de Santu Giuanne de Thiesi.
In Sardigna is òperas candidadas pro su reconnoschimentu pretziadu fiant 46 e, de custas, 42 ddas at valutadas sa giuria formada dae Carlo Atzeni de s’Universidade de Casteddu, Rossella Sanna de s’Assòtziu Natzionale de is Fraigadores Ediles (ANCE), Francesco Spanedda de s’Òrdine de is Architetos de Sardigna, Domizia Mandolesi, diretora de sa rivista “S’Indùstria de is Fràigos”, e dae Giuseppe Vallifuoco, architetu, professore e autore de sa rivista “Giornale de s’Architetura”.

Su reconnoschimentu est tocadu no isceti a is meres de is òperas o a is progetadores, ma fintzas a is impresas chi ant fatu is traballos, favoressende una collaboratzione intra de totu is partes.

Su Prèmiu regionale faghet parte de su tzircùitu natzionale: in totu Itàlia is òperas candidadas fiant sa bellesa de 1.200. “Sa punna est cussa de favorèssere su promovimentu e s’isparghidura de s’architetura in sa regione nostra”, ant naradu Andrea Casciu e Pierpaolo Tilocca, s’unu presidente de IN/Arch Sardigna e s’àteru de ANCE Sardigna.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.