MARIA GRAZIA MELE Vedova Cadeddu

Su Gazetinu, chenàbura 17 de maju de su 2024

Sa Sardigna abetat s’abba – Sighit in s’Ìsula nostra s’allarme pro sa sicànnia: su pistighìngiu de su mundu de su sartu sardu est semper prus mannu, pro more de su sighire de s’undada grave de sicànnia chi amegat de interessare giai dae una pariga de meses totu sa Sardigna e, a manera particulare, sa parte Tzentru-Orientale de s’ìsula.

Una situatzione chi durat dae ora e chi amegat de interessare fintzas is cussòrgias de sa parte de a intro, faghende dannu in totu su setore de sa pesamenta de su bestiàmene e de sa laurera.

S’emergèntzia ìdrica, chi giai dae ora nd’at faeddadu Coldiretti, interessende is istitutziones, at ingendradu fintzas s’apellu de sa Coldiretti Nùgoro-Ogiastra pro agiudare is siendas meda chi s’agatant in dificultade, apellu ascurtadu dae su prefetu de Nùgoro, Giancarlo Dionisi, chi at cunvocadu pro su 14 de maju passadu un’addòbiu in Cuestura cun 43 sìndigos de sa provìntzia.

A s’addòbiu ddoe ant pigadu parte su presidente e su diretore de Coldiretti Nùgoro-Ogiastra, Leonardo Salis e Alessandro Serra, cun una delegatzione de dirigentes de cussas cussòrgias.

S’allarme est mannu, siendas meda de Sardigna non nche-dda faghent prus e non renessent a parare fronte a custa simana longa de sicànnia, chi ingendrat dificultades siat pro su contivìgiu de sa sienda e siat econòmicas, cun balàngios chi a bortas torrant a sa metade pro more de sa crèschida de is ispesas acapiadas a is isfortzos pro chircare de propassare sa mancàntzia de abba.

“Cunsideradu chi fatu fatu non proet pro tempus meda, fintzas pro more de is mudaduras de su clima chi semus connoschende, non faghet prus a faeddare de istadu de emergèntzia”, ant naradu is ghiadores de Coldiretti Nùgoro-Ogiastra. “Retzimus de sighidu domandas de agiudu dae parte de is assotziados nostros, chi sunt chirchende de sarvare is siendas issoro e totu s’economia rurale, parte de importu de s’economia de sa regione nostra”. “Podimus pensare a manera discansosa chi s’intrada de s’istadiale at a fàghere crèschere s’istorbu”, acabbant Serra e Salis, “fintzas pro ite ca su bisòngiu de abba at a crèschere pro more de presèntzia de is turistas”.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.