Maria Adelaide Sanna

Su Gazetinu, giòbia 13 de làmpadas de su 2024

Is apuntamentos de sàbadu e domìnigu in Sardigna – Sunt medas is apuntamentos in Sardigna in custa coa de chida: in Tàtari, dae su 13 a su 15 de làmpadas, mùsica e birra artesanale gràtzias a su Tàtari Beer Fest: is maistros birràrgios ant a pònnere a loba is genias de birra diferentes de is 15 birrifìtzios presentes cun su mègius màndigu de bia, isulanu e internatzionale.

Garteddi, imbetzes, acasàgiat “Sùrbidos de binu”: unu caminu de duas dies (chenàbura e sàbadu) intra de is produsimentos vitivinìculos, sa cultura e is bellesas de su territòriu. No ant a mancare is sagras: dae su 14 a su 16 in Biddanoa de Tulu, pro sa festa de Santu Giulianu Màrturu, s’apuntamentu est comente a onni annu cun sa “Sagra de sa cherèsia”, mentras Assèmini, sàbadu e domìnigu, acasàgiat sa “Sagra de sa panada asseminesa” e Sarule sa “1^ Sagra de su casu de s’àrea GAL BMG” cun sa Cooperativa Unione Pastores de Sarule.

Tramudende a provìntzia de Aristanis, in Aristanis est totu prontu pro is tres dies de su Sacro Cuore Music Fest in su campu de is Frassinetos: a intrada gratis s’ant a pòdere sighire su DJ set, cuntzertos sonados in presèntzia e sa projetzione de sa partida Itàlia-Albania.

Sàbadu 15, imbetzes, in Boàtiri ddoe ant a fàghere su Boàtiri Festa de su Binu – Fèstival de sa Garnatza, cun is mègius cantinas, paradas de màndigos, mustras de coghina e mùsica sonada in presèntzia. Domìnigu, in Setzu, ddoe est “Beranu in Marmidda”, un’apuntamentu chi non faghet a ddu pèrdere cun mùsica, baddos, tastaduras e laboratòrios, intra de cultura e connotu.

In Casteddu, in sa coa de chida, protagonista at a èssere su vintage: sàbadu e domìnigu su Lazaretu, difatis, at a acasagiare su Mercadeddu de su Vintage. In cussas dies etotu, in Portescusi, ddoe at a èssere su Red Tuna Fest Portescusi, cun bìsitas cun acumpangiamentu, passigiadas, tastaduras e mùsica sonada in presèntzia.

Domìnigu, in fines, in Patiolla apuntamentu cun su teatru internatzionale: a is noe de merie is rifletores s’ant a puntare cara a Mamadou Dioume cun s’ispetàculu “A giru cun Mamadou Dioume e s’eredade de Peter Brook”.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.