ANTONIO SPANU

Su Gazetinu, chenàbura 26 de abrile de su 2024

Is pagamentos de is Comunes sardos a is siendas – Is Comunes sardos pagant is faturas a is siendas in 24 dies, 8 in mancu cunforma a sa mèdia italiana. Ddu narat sa Confartesania Sardigna in sa relata noa chi pertocat su 2023 e chi impreat is datos MEF-RGS.

Segundu su chi nd’est essidu a pìgiu dae custu analizu, s’ìsula est in su de bator postos intra de is regiones italianas e pagat is dèpidos 6 dies in antis de s’iscadèntzia apostivigada dae sa diretiva comunitària de s’UE in matèria (30 dies). Sa classìfica natzionale dda ghiat su Vènetu, chi pagat is faturas in 20 dies, sighidu dae su Friuli Venètzia-Giùlia e dae su Trentinu Artu-Àdige, chi pagant in 22 dies. In Calàbria pro pagare una fatura nche bolent 52 dies, mentras in Campània 47.

Is datos narant chi, de 375 Comunes chi nche tenimus in Sardigna, 242 ant pagadu a intro de 30 dies, est a nàrrere su 64,5% de is entes. Si pagat a intro de 60 dies in 124 Comunes e a intro de 90 dies in àteros 8. In unu Comune isceti ant pagadu in 180 dies. Pro su chi pertocat sa mèdia provintziale, sa provìntzia de Tàtari est cussa in ue pagant prus a lestru, sighida dae sa provìntzia de su Sud de Sardigna, dae cussas de Nùgoro, Aristanis e Casteddu.

“In Sardigna nch’at ancoras imprendidores chi retzint su chi depent retzire a pustis de 30 dies, oblighende-ddos a ispèndere resursas issoro o, peus, a s’indepidare cun su sistema de is bancas”, narat Fabio Mereu, presidente de Confartesania Impresas Sardigna. “Sa proposta nostra est crara: bisòngiat de cumpensare is dèpidos chi s’Amministratzione Pùblica tenet cun is impresas cun cussos fiscales e contributivos de is impresas frunidoras de s’Amministratzione Pùblica etotu”.

“Is impresas artesanas nostras non si podent permìtere su lussu de abetare su pagamentu de is faturas a tempus iscrètidu, fintzas pro ite issas etotu depent respetare su calendàriu de is pagamentas e de is contributos diferentes a s’Istadu”, at acabbadu su segretàriu regionale, Daniele Serra. “Tenimus unu muntone de esempros virtudosos de Comunes chi pagant in is tempos giustos: duncas, si podet fàghere”.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.