Più informazioni
Su Gazetinu, giòbia 2 de maju de su 2024
Sa Sardigna e is impiantos de energia annoàbile – Sa Giunta regionale ghiada dae Alessandra Todde at firmadu is autorizatziones a is impiantos noos pro su produsimentu de energia dae fontes annoàbiles. Unu determinu, custu, domandadu dae ora dae comitados de tzitadinos e assòtzios ambientalistas pro proare a frenare s’ispeculatzione in su territòriu.
Cun s’aprovu de si disinnu de lege “Provedimentos urgentes pro s’amparu de su paesàgiu, de is benes paesagìsticos e ambientales”, sa Giunta bolet eja autorizare su fràigu de impiantos noos, ma respetende però s’ambiente.
Su cuncordu de impiantos noos s’at a firmare duncas pro una simana de 18 meses, abetende chi sa Giunta aprovet ainas noas pro evitare àteras ispeculatziones.
“No m’apo a firmare de nàrrere chi semus in favore de su tramudu ecològicu”, at naradu sa guvernadora Alessandra Todde in s’addòbiu de sa Giunta, “ma semus contras de is chi, prenende-si sa buca de faeddos comente a amparu de s’ambiente e sustenibilidade, ispèculat e balàngiat de mala manera a dannu de sa terra e de su paesàgiu.
In is dies passadas fintzas s’assòtziu ambientalista Grupu de interventu giurìdicu (GriG) aiat sutaliniadu su bisòngiu de regulare su cuncordu de is impiantos, transende s’arriscu de “un’overdose de energia chi serbit isceti a is ispeculadores energèticos”.
Segundu sa Cunfederatzione Natzionale de is Artesanos sarda, si aprovant totu is progetos pro is impiantos noos, sa Sardigna diat prodùere unu tantu de energia agiomai a 12 bortas de prus de sa chi serbit a is sardos in un’annu.
E, si segundu sa relata de su Tzentru pro is istùdios de sa CNA is impiantos diant giuare in sa carrera econòmica isceti a is logos in ue ddos diant cuncordare, sa Cunfederatzione isperat in agiudos pro su produsimentu dae ispatzu dae sese prus che totu in is siendas. Unu sèberu prus sustenìbile chi diat permìtere de risparmiare meda.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
