Su Gazetinu, martis 9 de abrile de su 2024
Cun sa basca arribat fintzas sa timoria pro un’epidemia noa de Limba biaita – Creschet su pistighìngiu in su setore de sa pesamenta de su bestiàmene pro is temperaduras artas de custas ùrtimas dies: cun s’ampulada a susu de sa colunnedda de mercùriu, creschet difatis fintzas s’arriscu de un’undada noa de Limba biaita.
S’allarme dd’at bogadu sa Coldiretti Sardigna, chi at domandadu s’aprovu de unu pranu de atzione pro nche istesiare s’arriscu de un’epidemia chi diat pòdere acontèssere cun custas temperaduras.
Segundu is datos frunidos dae s’assòtziu, is pèrdidas e is costos ligados a su nde essire a pìgiu de sa maladia, e fintzas pro dda prevènnere, sunt mannos meda. In is ùrtimos 20 annos s’est contada un’ispesa de 170 milliones de èuros pro is repagamentos e pro sa morte de unu millione de berbeghes. A custu si ddoe atzunghet chi is pegus chi campant si fùrriant a èssere lunàdigos, unu pesu in prus pro is finàntzias de is siendas.
Arribada a primìtzios de su 2000, sa Limba biaita aiat mortu 260.856 berbeghes in su primu annu e 232.138 in su de duos: s’est contada un’intzidèntzia de sa mortàgia intra de su 18% e su 20%. A pustis sunt arribadas àteras undadas, intra de custas cudda de su 2003-2004 cun 995.546 pegus interessados e 75.797 pegus mortos e sa de is annos 2017-2018 cun 851.402 pegus malàidos e una mortàgia de su 4,18%. In su 2021 s’epidemia fiat ismenguada de meda, interessende però su 2,73% de is pegus de berbeghe e cun 29.737 animales mortos. In su mese de onniasantu de su 2023 in Sardigna at sonadu torra s’allarme, cun medas logos de mòvida de s’impestu chi ant interessadu dosinas de siendas.
“S’esempru de prus de 20 annos de undadas de maladias de is animales at mustradu chi est meda mègius a investire in preventzione direta e non direta chi no a intervènnere cun dinari pùblicu pro pagare sos dannos”, at naradu Battista Cualbu, presidente de Coldiretti Sardigna. “Est pro cussu chi domandamus a sa Giunta regionale noa de intervènnere a lestru pro parare fronte luegos a is dificultades e pro lòmpere prontos, si torrat a mòvere s’impestu”.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
commenta