Su Gazetinu, giòbia 4 de abrile de su 2024
Una Pasca Manna prus segura in Sardigna cun is controllos de su NAS – In is festas de Pasca Manna is Carabineris de su NAS ant fatu unas cantas averiguaduras intra de Casteddu, Aristanis e Tàtari.
Prus a fine, in antis de is festas, in provìntza de Tàtari su bilàntziu est bastante grae: difatis, sunt 60 is averiguaduras fatas dae is Carabineris de su NAS chi ant portadu a nde issucutare 855 chilos de columbas e de oos de tziculate, cun 30 mìgia èuros de contraventziones postas a 18 laboratòrios e cun sa suspensione o sa serrada de unas cantas butegas e laboratòrios de bator siendas de cussa cussòrgia.
Ma, semper pro Pasca Manna, is Carabineris de su NAS ant fatu unas cantas averiguaduras fintzas in provìntzia de Casteddu e in provìntzia de Aristanis, in ue ant controlladu 110 atividades cummertziales e iscoberende 35 irregularidades chi ant portadu a pònnere contraventziones pro 10,000 èuros e a nde issucutare unos 30 chilos de produsimentos de forru.
Sa genia de irregularidades iscumproadas sunt diferentes, cumentzende dae sa pagu pulidura e igiene de is logos de produsimentu e depòsitu de is ingredientes, a su de no àere respetadu sa preventzione chi pertocat sa seguresa alimentare, a su custoimentu de is prodùsidos – a bortas sena de is etichetas pro sa tratziabilidade o iscadidos – in logos prenos de topes.
Ma non bastat, in custas averiguaduras, is Carabineris ant iscobertu fintzas columbas e oos de tziculate de produsimentu industriale chi, isboligados, ddos ant torrados a imboligare e ddos ant bèndidos comente a produsimentos artesanales, a prètziu prus mannu.
Is averiguaduras, prus che totu pro is durches pro Pasca Manna, ddas at apostivigadas a livellu natzionale su Cumandu de is Carabineris pro s’amparu de sa salude, de acòrdiu cun su Ministeru de sa Salude. In totu Itàlia is Carabineris ant fatu 840 averiguaduras, agatende irregularidades in 324 siendas, nd’ant piscadu 574 violatziones penales e amministrativas, ponende contraventziones pro 425.000 èuros, e nd’ant issucutadu 2 tonnelladas de cosa de papare, pro unu valore de 267 mìgia èuros.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
commenta