Su Gazetinu, martis 26 de martzu de su 2024
Su problema de sa sicànnia in Sardigna – Is sartos sardos sunt in suferèntzia pro more de sa sicànnia: sunt medas is dificultades connotas no isceti dae is siendas agrìculas, ma fintzas dae cussas de pesamenta de bestiàmene e dae is tzitadinos, a manera generale, pro more de is ierros semper prus pagu proighinosos. A custu barrancu mannu si ddoe atzunghet unu problema nou: s’iscàrrigu de abba in mare dae unas cantas digas sardas. Est su chi at denuntziadu Coldiretti Sardigna unas cantas dies a oe in unu documentu.
Un’esempru craru est su chi est acontessende in su Campidanu e chi pertocat is digas de su Tirsu e de su Flumendosa: sa prima est iscarrighende abba a mare pro more chi oramai est lòmpida a su livellu prus artu, mentras s’àtera est in ammancu ìdricu giai dae ora, cun unu livellu de 200 milliones de metros cubos in mancu cunforma a su 2023.
“Una situatzione mala a suportare”, aici ddi narant Battista Cualbu e Luca Saba, presidente e diretore de s’assòtziu, chi ant postu in fatu sa denùntzia fata in is dies passadas fintzas dae s’Anbi regionale e su pistighìngiu mannu de su Cunsòrtziu de bonìfica de sa Sardigna de Cabu de Giosso, in contu de su problema grave chi s’amegat de bìere in custas dies in sa gestione de s’abba e de is infrastruturas ìdricas.
Rispondende a Coldiretti Sardigna, s’Enas, s’Ente pro s’Abba de sa Sardigna, nche ghetat sa neghe de is isperdìtzios de su Tirsu a subra de sa Regione, sutalineende chi si nche lassant fuire a mare chentinas de mìgias de metros cubos de abba in custa simana de sicànnia. In unu documentu ufitziale, faghet a ischire de no àere retzidu is resursas finantziàrias chi serbint pro sa gestione de su sistema, mancari ddas apat pedidas bortas meda.
“In is meses passados, mancari is sinnaladuras fatas dae su Cummissàriu istraordinàriu a manera formale e a manera non formale a is organismos cumpetentes siant istadas medas, no est lòmpida una solutzione capatza de prenare custu ammancu e de assegurare is resursas finantziàrias chi serbint pro sa gestione de su sistema”, si leghet in su documentu de s’Ente, chi narat chi at giai incarreradu is cuntatos pretzisos cun s’amministratzione regionale chi intrat.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
commenta