Su Gazetinu, chenàbura 22 de martzu de su 2024
Pasca Manna, sorpresas malas pro is sardos – Is prètzios in su cummèrtziu a minudu sighint a crèschere in s’Ìsula, lassende rastros fungudos in s’ispesa de is famìllias: Pasca Manna e is festas suas ant a presentare unu contu salidu a is sardos.
“Is benes alimentares”, narat Giorgio Vargiu, presidente de Adiconsum, “in s’ùrtimu mese creschent in mèdia de su 4,1% cunforma a su 2023, cun puntas de +15/20% pro is oos de tziculate e de + 5/10% pro is columbas. Sa cosa de bufare costat su 3,5% in prus e, duncas, a istèrrere sa mesa pro Pasca Manna ocannu at a costare de prus”.
Ma fintzas chie pro su pràngiu de Pasca Manna at a andare a ristorante at a dèpere fàghere is contos cun s’incarimentu de is prètzios: sa crèschida mesana est de su 4,3%, cun puntas de su 5,4% in Terranoa-Tèmpiu. Creschent de su 4,7%, cun puntas de su 13,3% in Terranoa, fintzas is albergos e is àteras istruturas de retzimentu. E non faeddamus de is tarifas aèreas chi sunt atrufuddadas a manera ispantosa, prus che totu pro is chi torrant a Sardigna pro nche passare sa Pasca.
Pro cussu s’Adiconsum at cuncordadu unu decàlogu utilosu pro isparanniare e pro fàghere còmporas cun cuscièntzia: si consìgiat de detzìdere in antis su menu de Pasca, de fàghere una lista a fine de is cosas de comporare e de ddas comporare una pariga de dies in antis, pro evitare is incarimentos de s’ùrtimu momentu o is isperdìtzios de sa die in fatu.
Mègius a comporare produsimentos de istajone, prus baratos, e cosa de papare de logos nostros o a km zero, leghende bene su logu de produsimentu inditadu in s’eticheta. Est utilosu, in prus, a cunfrontare is ofertas e is manifesteddos de is marcos diferentes de sa distributzione isparta, a evitare is ofertas 3X2 i is imboligadas mannas pro sa famìllia.
Pro sa fruta e sa birdura, imbetzes, est mègius a comporare in is mercados e in is paradas de bighinadu o de sa zona. Est mègius a seberare is oos de tziculate de calidade bona, mentras pro is columbas faghet a nde aprofitare de is ofertas de sa distributzione isparta, donende atentu però a su pesu e a is ingredientes. In fines, Adiconsum regordat chi cun is restos de Pasca Manna e de su Lunis de Pasca si podent cungiminare màndigos noos pro is dies afatantes.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
commenta