Su Gazetinu, mèrcuris 20 de martzu de su 2024
Caminos abertos – Ant a passare peri logos ispantosos is caminos propostos cun “Caminos Abertos”, sa faina cuncordada dae sa Regione Ùmbria a ue ddoe at pigadu parte fintzas s’Ìsula nostra a intro de su programma natzionale “Iscoberi s’Itàlia chi non connoschias – Biàgiu italianu”.
Su progetu bolet promòvere su turismu lentu cun caminos e itineràrios chi potzant fàghere a connòschere logos bellos de Itàlia. In is dies de su 13 e de su 14 de abrile in totu Itàlia is caminos seberados ant a èssere 42, est a nàrrere duos pro onni regione o provìntzia autònoma, cun prus de 2.000 caminadores interessados.
In Sardigna si cumentzat sàbadu cun su Caminu frantziscanu, un’àndala peri is rastros lassados dae is paras in s’Ìsula nostra. Su tretu de caminu imprassat is provìntzias de Aristanis e de su Sud de Sardigna. Dae Làconi, bidda nadìa de santu Fra Nàtziu e unu de is sìmbolus frantziscanus, s’at a mòvere cara a Geroni. Andende andende s’ant a pòdere bìere su parcu Aymerich, su Menhir museum, is crèsias dedicadas a Sant’Ambrògiu e a Santu Fra Nàtziu e sa domo nadìa de su santu in Làconi. Sighende in su caminu s’at a arribare a Geroni, a pees de su pranu de sa Jara.
Domìnigu is caminadores ant a mòvere cara a su logu mineràriu de Santa Bàrbara. Is caminadores ant a mòvere dae Igrèsias e ant a furriare a Igrèsias, passende peri padentes de èlighes e de àteru matedu mediterràneu. Ant a passare peri Frùmini Majori e is grutas de Su Mannau, fintzas a lòmpere a sa miniera betza de Su Tzùrfuru. S’at a pòdere bisitare fintzas su museu cuncordadu in is fàbbricos mineràrios betzos.
““Iscoberi s’Itàlia chi non connoschias” est una manera de promovimentu a cumone pensadu dae is regiones italianas, su resurtadu de un’acòrdiu de programma intra de su Ministèriu de su Turismu e sa Cummissione pro is Polìticas pro su Turismu de sa Cunferèntzia de is Regiones e de is Provìntzias autònomas, a manos de pare cun ENIT”, narant is organizadores. Ma in “Caminos Abertos” ddoe sunt interessados fintzas duos partner de importu: su Club Alpinu Italianu e sa Federatzione Italiana pro su Propassamentu de s’Handicap, pro fàghere a manera chi is caminos siant semper de prus abertos a totus e inclusivos.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.
commenta