Su Gazetinu, giòbia 14 de nadale de su 2023
S’àliga nucleare nde-diant pòdere batire a Sardigna – Totu in una, eris est essida a campu a manera ufitziale sa nova de su sèberu de 51 logos in totu Itàlia chi diant èssere bellos pro ddoe acasagiare s’àliga nucleare: in s’elencu fatu dae su Ministeru pro s’Ambiente e sa Seguresa energètica non ddoe sunt logos de sa Penìsula isceti, ma fintzas oto logos de Sardigna.
Custos logos sardos s’agatant in provìntzia de Aristanis, in Marmidda Arta, e in su Sud de Sardigna. Semus faeddende de is sartos de is comunes de Ollasta, Assou, Useddus, Mandas, Seurgus Donigala, Segariu, Mara Arbarei, Setzu, Tuili, Ussaramanna, Nurri, Ottacesus e Guasila.
Amministradores e polìticos si sunt chesciados luegos contras de sa detzisione de su Guvernu tzentrale. “Sa Sardigna at giai espressadu su parre suo cun unu referendum in ue su No no lassat sa ghenna aberta a duda peruna. Su de torrare a propònnere sa Sardigna comente a sea pro acasagiare s’àliga nucleare – si esseret cosa bera – diat èssere un’afracada chi sa Regione Sarda e totu su Pòpulu sardu non diant suportare”, at naradu su presidente de sa Regione, Christian Solinas.
In provìntzia de Aristanis, mancari su sìndigu de Useddus Fabrizio Cao tèngiat ispera bella, pro ite ca is logos de Marmidda ddos ant postos comente a riservas isceti, su primu tzitadinu de Assou Giuseppe Minnei est prus pistighingiadu. “Semus faghende isfortzos mannos meda pro avalorare is logos nostros e immoe s’Istadu nde cheret batire a innoghe cussa àliga perigulosa. Giòvanos meda diant bòlere incarrerare a traballare in is sartos nostros, ma si acontesset su chi ant pensadu in Roma si nche fuint deretu”.
Dae parte issoro, is polìticos de sa minoria de su Consìgiu regionale e de su Parlamentu de Roma acutzant sa ferramenta. Dae su consigieri regionale de europa birde, Diego Loi, chi est fintzas sìndigu de Santu Lussurzu, a su cabu-cambarada de su Movimentu de is 5 Isteddos, Alessandro solinas, a sa consigiera regionale de alleàntzia Ruja-Birde, Laura Caddeo, fintzas a su deputadu de su PD Silvio Lai, sa cundenna contras de custu determinu de su Guvernu natzionale est firma.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2022-2023 – L.R. 22/2018, art. 22.
commenta