Su Gazetinu, chenàbura 10 de onniasantu de su 2023
Sa coa de chida in provìntzia de Aristanis – Dae su teatru a sa cultura, passende peri su connotu, fintzas a sa salude e a s’isport: custa coa de chida puru de onniasantu est rica meda de addòbios in provìntzia de Aristanis.
In sa tzitade de Lionora at a èssere unu sàbadu dedicadu a sa salude: a pustis de su cunvènniu de s’ANIAD intituladu “Su diabete mobìlitat”, ddoe at a èssere un’apedalada in cumpangia. Su domìnigu, imbetzes, at a èssere dedicadu a sa cultura, cun s’istòria de sa tzitade bida cun is pàginas de “Chentu annos de tzìnema in Aristanis. Contos de famìllia”, unu libru in contu de sa multisala Ariston.
Sa die at a sighire cun is bìsitas de su FAI “Dae is tumbas: contos e personàgios de Aristanis”, unu biàgiu peri is tumbas de persones nòdidas interradas in tzitade. A merie ddoe at a àere un’apuntamentu nou cun sa rassigna “Domìnigu in cuntzertu”: in su palcu de su Museu diotzesanu ant a torrare a propònnere “Su Romantitzismu cuadu”.
Tramudende a Milis, ddoe agatamus unu de is apuntamentos prus abetados dae is amantiosos de enologia: sa Rassigna de su Binu de Sardigna. Sàbadu e domìnigu at a fàghere a tastare su binu nou, cussu biològicu, sa Garnatza DOC e su binu Terraba DOC.
Sàbadu, in Marrùbiu, is pitzocheddos de iscola si nd’ant a incurare de olivicultura e ant a andare a nde ispibidare s’olia de is matas comunales: prenos is iscarteddos, nche ddos ant a portare a sa prentza e ant a pòdere tastare s’ògiu nou.
In Sune, sàbadu 11 de onniasantu, sighit sa rassigna de teatru “Sunidentidade in teatru”: in iscena ddoe at a èssere s’ispetàculu bogadu dae su romanzu “Sos sinnos” de su bitzichesu Mialinu Pira. In su palcu, a prus de s’atore e regista nugoresu Giovanni Carroni, fintzas is musitzistas Omar Bandinu e Fabio Coronas.
In Làconi e in Nuradha domìnigu ant a pensare a sa salude in ocasione de sa Die mundiale de su diabete. A pustis de una caminada bella dae Nuradha a Làconi, ddoe at a èssere su pràngiu in cumpangia. Ma is tzitadinos ant a pòdere fàghere controllos gratis pro prevènnere sa maladia e ant a pòdere pigare parte a unu cunvènniu de importu.
Antoni Nàtziu Garau
Faina fata cun s’agiudu de sa Regione Sardigna – IMPRENTAS 2022-2023 – L.R. 22/2018, art. 22.
commenta