Su Gazetinu, lunis 3 de ghennàrgiu de su 2022
In Sardigna puru meighinas noas e vatzinos noos pro cumbàtere su Coronavirus – Arribant meighinas noas e vatzinos noos pro chircare de firmare su Coronavirus. Cras ant a arribare a s’ìsula puru is duos antivirales – Molnupivar e Remdesivir – pro sa cura de is malàidos chi non sunt in s’ispidale pro Covid-19 “cun maladia lèbia-pàsida essida a pìgiu dae pagu tempus e cun àteras maladias chi diant pòdere favorèssere s’isvilupu de sa Covid-19 in forma grave”.
Sa Cummissione tècnicu-iscientìfica de s’Agentzia italiana de is meighinas nd’at autorizadu s’impreu.
Su Molnupiravir est un’antivirale orale chi si cussìgiat de ddu pigare a intro de 5 dies dae cando essint is primos sinnales. Sa dura de su tratamentu, chi si faghet pighende 4 pìndulas (de 200 mg) duas bortas a sa die, est de 5 dies.
Sa determinatzione Aifa chi pertocat sa manera de impreu dd’ant publicada su 29 de su mese de nadale passadu in sa Gazeta Ufitziale e est intrada in vigèntzia su 30 de nadale.
Pro Remdesivir Ema at autorizadu dae pagu tempus un’ammanniamentu de inditu chi pertocat su tratamentu de is persones chi non sunt in ossìgenu-terapia in arriscu artu de Covid-19 grave e sa meighina si podet pigare fintzas a 7 dies dae cando essint is primos sinnales.
Sa dura de su tratamentu, chi si faghet cun un’inietzione in vena, est de 3 dies.
A intro de su mese de ghennàrgiu ant a arribare a Itàlia fintzas is primas doses de Novavax, su vatzinu “traditzionale” cun base protèica. S’Agentzia italiana de is meighinas dd’at autorizadu comente a vatzinu pro fàghere is primas doses isceti e duncas non pro is àteras afatantes. Un’inditu chi paret lassare s’impreu de custu antìdotu nou contras de sa Covid, su de chimbe autorizadu fintzas a immoe, pro totu is italianos chi ant a detzìdere de s’immunizare intra de cuddos chi non si sunt vatzinados ancoras. Est pro cussu chi dd’ant giai torradu a batijare su vatzinu pro is chi sunt contras de su vatzinu etotu.
Antoni Nàtziu Garau
Attività realizzata col contributo della Regione Sardegna – IMPRENTAS 2021-2022. LR 22/2018, art. 22
commenta