Su Gazetinu, lunis 6 de nadale de su 2021
Intrant in vigèntzia oe is règulas noas in contu de su chi ddi narant Super tzertificadu birde, postu pro chircare de firmare is impestos de su Coronavirus. Su Super tzertificadu birde at a abarrare in vigèntzia fintzas a su 15 de ghennàrgiu e su documentu at a tènnere una dura de 9 meses. Dd’ant a pedire a is chi depent sètzere in is mezos pùblicos, francu is mezos locales. In prus at a dare sa possibilidade de intrare a ristorante, a tzilleri, a tzìnema, a teatru e a s’istàdiu. A diferèntzia de su Tzertificadu birde normale dd’ant a dare isceti a is chi sunt sanados dae sa Covid-19 o a cussos chi si sunt vatzinados. Su Tzertificadu birde normale chi si podet otènnere fintzas cun unu tampone at a permìtere ancoras de pigare parte a cojas, batiares e cunfirmas, mentras pro is festas de cumpleannu o de làurea at a serbire su Super tzertificadu birde. Is chi no respetant custos disponimentos noos arriscant una contraventzione chi movet dae 400 èuros e podet arribare fintzas a 1.000 èuros.
Chie tenet ancoras carchi duda podet agatare informos in is “FAQ” publicadas in sa pàgina a s’aposta de su situ Internet de su Guvernu.
Tocat de regordare, in fines, chi dae su 15 de nadale movet s’òbligu de su vatzinu pro is fortzas de s’òrdine e pro su personale de s’iscola.
Antoni Nàtziu Garau
—–
Attività realizzata col contributo della Regione Sardegna – IMPRENTAS 2020-2021. LR 22/2018, art. 22
commenta