Chenàbura, 18 de làmpadas de su 2021
Basca meda, avisu de s’Amparu tzivile regionale – Basca meda in Sardigna dae oe e fintzas a lunis. Cunforma a is previsiones s’at a arribare fintzas a 40 grados e, antzis, sa temperadura chi intendimus (non cussa reale, duncas) at a èssere fintzas prus arta. Est pro cussu chi s’Amparu tzivile regionale at bogadu un’avisu de cunditziones mèteu perigulosas chi balet dae oe fintzas a lunis, pro avisare in contu de is arriscos chi un’undada de basca che a custa podent ingendrare.
Lassapassare birde – Intrat in vigèntzia su lassapassare birde chi dae làmpadas at a permìtere de tzirculare a manera prus lìbera, propassende unos cantos proibimentos nàschidos pro more de su Coronavirus. Su presidente de su Consìgiu de is Ministros Draghi at firmadu su decretu a s’aposta in is pròpias oras in ue sa Sardigna amegaiant de dda classificare comente a zona birde europea.
Fogu – Pro domare unos cantos fogos chi eris sunt acontèssidos in provìntzia de Aristanis sunt dèpidos intervènnere elicòteros e iscuadras de istudadores cun mezos meda. Su fogu at interessadu is territòrios de is comunes de Boàtiri, Crabas, Nurachi, Ollasta, Simaghis e Bosa.
Donatziones de sàmbene – S’Avis at cuncordadu una regorta de sàmbene in unas cantas biddas de sa provìntzia de Aristanis. Oe su sàmbene s’at a pòdere dare in Frussio, cras in Samugheo e domìnigu in Arborea e in Arriora.
Antoni Nàtziu Garau
commenta