Su Gazetinu, 29 de maju de su 2021
Su Gazetinu
Abas e Terraba, tzentros pro is vatzinos – In Abas aberit su tzentru pro is vatzinos, mentras in Terraba nono. Is sìndigos de su Campidanu de Terraba si sunt chesciados narende chi s’Ats no ddis at frunidu is vatzinos.
Norghiddo, tzìnema in logu abertu – Ocannu puru su Comune de Norghiddo at a propònnere su tzìnema in logu abertu. S’at a fàghere in su Parcu de sa mùsica.
Die ecològica in su Sinis – Die ecològica oe in su Sinis cuncordada dae s’Àrea marina amparada Penìsula de su Sinis-Ìsula de Malu Entu e dae su Comune de Crabas. Is voluntàrios ant a limpiare totu s’àliga e su bascaràmene in su tretu de costera chi movet dae Is Arutas e arribat a Portu Suedda.
Contributos a is istudiantes – Chimbanta contributos pro s’istùdiu de 200 èuros pro pitzocheddas e pitzocheddos chi a pustis de su diploma de s’iscola mèdia sighint is istùdios me in is iscolas superiores. E binti bussas de istùdiu de 500 èuros pro chie – a pustis de sa maturidade – s’ant a iscrìere in s’universidade. Ocannu puru sa Caritas diotzesana de Aristanis at detzisu de ghetare una manu de agiudu a is istudiantes de sa diòtzesi. S’iscadèntzia pro presentare is domandas sunt diferentes: su 30 de trìulas pro is contributos pro s’istùdiu (diplomados de tertza mèdia), su 5 de santandria pro is bussas de istùdiu (diplomados de is iscolas superiores).
Sàbadu, 29 de maju de su 2021
Antoni Nàtziu Garau
—-
Attività realizzata col contributo della Regione Sardegna – IMPRENTAS 2020-2021. LR 22/2018, art. 22
commenta