Su Gazetinu, 14 de maju de su 2021

Su Gazetinu

Su Gazetinu, 14 de maju de su 2021

Su Gazetinu

Prenotatzione de is vatzinos – Dae oe in Sardigna puru is vatzinatziones contras de sa Covid-19 si depent prenotare impreende su sistema de Postas Italianas. Sunt a disponimentu una pàgina Internet e fintzas unu nùmeru birde. In prus, de chida chi benit at a fàghere a si prenotare fintzas in is ufìtzios in ue si cunsignat sa currispondèntzia.

Tzentru pro is vatzinos, istorbos – Istorbos mannos eris in su tzentru pro is vatzinos cuncordadu in su palatzieddu pro s’isport de Sa Rodia, in Aristanis. Unu muntone de problemas at ingendradu tempos de abetu longos, fintzas de unas cantas oras. A suta de su sole abetende ddoe fiant fintzas antzianos lòmpidos dae is biddas de sa provìntzia. Istorbos fintzas pro su tràficu in sa zona de Sa Rodia.

Emergèntzia Covid-19, contraventziones – Sa Politzia at postu unas cantas contraventziones in su tzentru de Aristanis, in ue at iscobertu situatziones perigulosas de atropèlliu de gente. Is contraventziones ddas ant postas pro no àere respetadu sa normativa pro firmare s’isparghidura de sa pandemia de Coronavirus.

Averiguaduras oncològicas – Is règulas pro pigare parte a unas cantas averiguaduras oncològicas de sa Assl de Aristanis mudant. Su Servìtziu dedicadu a sa preventzione ativa de is tumores de sa tita, de sa madre e de su colon deretu at a sighire a mandare comente a semper una lìtera de invitu a domo de is tzitadinos residentes in provìntzia de Aristanis, ma is chi retzint sa comunicatzione ant a dèpere prenotare s’apuntamentu telefonende a su nùmeru birde 800 186 000.

Chenàbura, 14 de maju de su 2021

Antoni Nàtziu Garau

—-

Attività realizzata col contributo della Regione Sardegna – IMPRENTAS 2020-2021. LR 22/2018, art. 22

commenta

Tutte le notizie

Su Gazetinu, lunis 22 de abrile de su 2024

Su Gazetinu, lunis 22 de abrile de su 2024

Is setziones Avis de sa regione s’addòbiant in Casteddu Sardu – Is voluntàrios de is setziones Avis de Sardigna si sunt addobiados eris in Casteddu Sardu pro sa de 53 assembleas annuales de s’Avis regionale, chi est istada fintzas s’ocasione pro faeddare de sa situatzione de is donatziones de sàmbene in s’Ìsula.

In su 2023 in Sardigna ant fatu 80.459 donatziones e, de custas, sa bellesa de 56.917 regortas dae is voluntàrios de s’Avis. Nùmeros incoragidores, si si pensat chi in su 2022 is sachitas fiant istadas 1381 in mancu.

Ma, mancari custos datos lassent isperare in bonu, s’Ìsula est ancoras in suferèntzia e ddi benit a mala bògia a importare sachitas de sàmbene pro parare fronte a sa domanda manna de sàmbene. Si contat, difatis, chi su bisòngiu regionale de ocannu passadu siat istadu de unas 110.000 sachitas, chi at fatu a ddoe parare fronte cun 80.000 donatziones de is sardos e 30.000 sachitas arribadas dae àteras regiones.

“Su de bastare dae sese pro su chi pertocat su bisòngiu regionale non depet èssere una chimera, ma sa raja de unu caminu istabilèssidu, in ue onniunu chi faghet parte de su sistema depet tènnere craru su rolu suo e, su pròpiu, depet tènnere craru sa tarea chi depet fàghere”, at naradu su presidente de s’Avis regionale Sardigna, Vincenzo Dore, invitende a totu is tzitadinos a èssere responsàbiles.

Comente a semper, su traballu de s’Avis in sa regorta de sàmbene est de importu, cun fainas meda e dies dedicadas a sa donatzione. “S’impignu nostru isceti in unu sistema cumplessu comente a cussu regionale non podet bastare”, at sutaliniadu Dore. “Bolemus torrare a espressare sa disponibilidade a traballare a manos de pare cun sa Giunta Todde, presentare is domandas e is progetos nostros pro parare fronte a manera funguda a totu is chistiones de su sistema regionale de sa regorta de su sàmbene”.

“Su de donare est una faina manna de bonucoro chi podet sarvare vidas meda”, at acabbadu su presidente Dore. “Su de fàghere parte de s’Avis bolet nàrrere a s’agatare in una cambarada de amigos impignada in s’isparghidura de is valores de su bonucoro, de sa tzitadinàntzia ativa e de sa cultura de su donu, prus che totu intra de is generatziones noas”.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.