Su Gazetinu, 11 de maju de su 2021
Su Gazetinu
Torrat s’abba – A pustis de sa die de istadiale de eris, cun temperaduras chi ant propassadu 30 grados, dae oe torrat s’abba fintzas in provìntzia de Aristanis. Si previdet un’ismèngua de is temperaduras de unos deghe grados.
Vatzinu pro is chi tenent chimbanta annos – Dae chenàbura chi benit in Sardigna puru is chi tenent chimbanta annos s’ant a pòdere allistare pro domandare de ddos vatzinare contras de su Coronavirus. Dd’at fatu a ischire sa Regione. S’at a dèpere impreare su portale de Poste Italiane.
Tzertificadu de vatzinatzione – Totu is chi ant pigadu parte a is Dies de sa vatzinatzione in is chidas passadas nde podent retirare su tzertificadu. S’Assl de Aristanis at fatu a ischire comente si podet fàghere.
Crabas, averiguaduras negativas – Sunt totu negativas is primas averiguaduras contras de su Coronavirus fatas eris in is iscolas primàrias de Crabas. Cras ant a sighire. Su sìndigu Andrea Abis at invitadu a is babbos e mammas a allistare a is fìgios issoro.
Turri Manna, bandera biaita – Turri Manna ocannu puru at otentu sa bandera biaita. Est sa de ùndighi bortas chi dd’assignant custu reconnoschimentu.
Marmidda, regorta seberada de s’àliga – Is comunes de Marmidda sunt virtudosos: sunt lòmpidos a s’81 % de regorta seberada de s’àliga. Immoe sunt pensende fintzas a su compostàgiu fatu in domo etotu.
Martis, 11 de maju de su 2021
Antoni Nàtziu Garau
—-
Attività realizzata col contributo della Regione Sardegna – IMPRENTAS 2020-2021. LR 22/2018, art. 22
commenta