Su Gazetinu, 10 de maju de su 2021
Su Gazetinu
Sucursu in mare – Una motovedeta de sa Guàrdia de Finàntzia at sarvadu eris a un’òmine e a is fìgias suas in su mare de Arbus. Is duas pitzocheddas fiant in su sup e su babbu est intervènnidu pro ddas agiudare, cando at bidu chi su bentu amegaiat de nche ddas ispìnghere a largu. Totu e is tres si sunt agatados in dificultade. Sa motovedeta nde ddos at pigados dae s’abba e nche ddos at acumpangiados a su portu industriale de Aristanis-Santa Justa.
Crabas, traballos in su Riu Tanui – Su Comitadu tzìvicu de Crabas e sa Lipu de Aristanis domandant de firmare in presse is traballos de limpiadura de is oros de su Riu Tanui. Is traballos chi amegat de fàghere su Cunsòrtziu de Bonìfica, difatis, arriscant de ispèrdere is nios de unas cantas genias de pugiones de s’ecosistema acuàticu.
Càmera de Cummèrtziu, prataformas social – Sa Càmera de Cummèrtziu de Casteddu-Aristanis at cuncordadu duos seminàrios in lìnia dedicados a is prataformas social. S’ant a fàghere chenàbura chi benit e sunt gratis. Ddoe podent pigare parte impresas, traballadores e professionistas.
Lunis, 10 de maju de su 2021
Antoni Nàtziu Garau
—-
Attività realizzata col contributo della Regione Sardegna – IMPRENTAS 2020-2021. LR 22/2018, art. 22
commenta