Iscrucullu vatzinos – In s’iscrucullu in contu de is vatzinos contras de sa Covid-19 fatos a parentes e a amigos ddoe at a èssere fintzas un’àteru sanitàriu indagadu. Traballat in unu tzentru vatzinale de sa provìntzia de Aristanis.
Faina antidroga – In Aristanis si contant un’arrestu e ses denùntzias in una faina antidroga de sa Politzia. Ddoe sunt interessados fintzas unos cantos minorennes.
Denuntziadu a pustis de s’intzidente – A un’òmine de Marrùbiu dd’ant denuntziadu is Carabineris a pustis chi nch’est essidu foras de carrera cun sa màchina sua. Ant averiguadu chi fiat ghiende imbriagu.
Coronavirus – In Aristanis si contat un’àteru mortu pro more de su Coronavirus: est su de sèighi. In s’interis, nde sunt essidos a pìgiu impestos noos in Narabuia e in Bonàrcadu. Totu sanados, imbetzes, in Milis e in Làconi.
Rèdditu de tzitadinàntzia – S’INPS at fatu a ischire chi in su mese passadu, in provìntzia de Aristanis, is famìllias chi ant tiradu su rèdditu de tzitadinàntzia sunt istadas 3241, est a nàrrere 6635 persones, cun una mèdia de 534,97 èuros a su mese.
Iscola digitale – S’Istitutu Othoca de Aristanis e s’Istitutu cumprensivu de Simaghis-Biddobrana andant a sa fase regionale de su cuncursu Iscola digitale. Eris si sunt fatas is seletziones in s’Istitutu Don Deodato Meloni de Aristanis.
Mèrcuris, 28 de abrile de su 2021
Antoni Nàtziu Garau
—-
Attività realizzata col contributo della Regione Sardegna – IMPRENTAS 2020-2021. LR 22/2018, art. 22
commenta