Su Gazetinu, 19 de abrile de su 2021
Su Gazetinu
Vatzinatziones a is antzianos – Custu merie is voluntàrios de s’Amparu tzivile Arci de Aristanis ant a cunvocare a is antzianos de is chi tenent 80 annos o prus chi non sunt vatzinados ancoras. Cun issos at a gabbare su faghimentu de is primas doses a is antzianos. Sa die de sa vatzinatzione, chenàbura chi benit, s’ant a pòdere presentare, a prus de is residentes cunvocados cun lìtera, fintzas is chi tenent prus de otanta annos chi bivent in tzitade o chi sunt residentes in àteras biddas.
Mortu in Bosa – Torra un’àteru mortu in Bosa pro more de su Coronavirus. Su sìndigu Pier Franco Casula at fatu a ischire de sa morte de Salvatore Farina. S’òmine, chi teniat 79 annos, sufriat de àteras maladias e fiat ricoveradu in s’ispidale “Delogu” de Ilartzi. Nd’aiat piscadu su virus duas chidas a oe. In Bosa su nùmeru de is mortos pro more de su Coronavirus est lòmpidu in totu a 17.
Mustra in Bàini – Su Comune de Bàini, sa sotziedade Nur e sa biblioteca Gramsciana afestant su 25 de abrile. Domìnigu a merie si previdet s’inauguratzione virtuale de sa mustra “25×4. Contras de s’islofiamentu intelletuale”, cun òperas fatas dae 66 artistas. Is òperas movent dae una lìtera chi Antoni Gramsci aiat iscritu dae Ùstica.
Nie in Gennargentu – In Gennargentu est niende. Passadu su sole de beranu chi s’est connotu pro una pariga de dies, in is ùrtimas oras binchet su fritu. E aici est torradu su nie, chi si podet bìere fintzas in sa retza webcam de Sardigna Clima Onlus.
Lunis, 19 de abrile de su 2021
Antoni Nàtziu Garau
—-
Attività realizzata col contributo della Regione Sardegna – IMPRENTAS 2020-2021. LR 22/2018, art. 22
commenta