Su Gazetinu,17 de abrile de su 2021
Su Gazetinu
Zona ruja – Sa Sardigna abarrat in zona ruja a su mancus un’àtera chida. Sa cabina de regia chi averìguat comente totu est andende sa pandemia in Itàlia nd’at piscadu pro sa Sardigna un’ìndighe de impestu ancoras artu meda.
Letos pro is malàidos de Civid-19 – In s’ispidale “Mastino” de Bosa ant cuncordadu àteros 15 letos pro is malàidos de Covid, cunsideradu chi sa maladia amegat de s’ispàrghere ancoras. Custos letos noos sunt acasagiados in su repartu de Meighina.
“Malàidos dìligos” – Is “malàidos dìligos” sighint a si chesciare, pro ite ca – mancari s’Istitutu Superiore de Sanidade e su Ministeru de sa Salude apant iscritu chi bolent vatzinados intra de is primos – ancoras no ant otentu su vatzinu contras de su Coronavirus. In medas non si podent iscrìere in su portale regionale de is prenotatziones, pro ite ca tenent unu còdighe de esentzione pro is maladias chi nde sufrint, e abetant duncas a ddos cunvocare s’Ats, cosa chi pro immoe no est acontèssida. B’at, in prus, sa chistione de is “malàidos dìligos” arrimados, màrturos, chi non podent caminare: s’Ats ddos diat dèpere vatzinare in domo issoro, ma ancoras non s’est mòvidu nudda.
Mortu su cumandante Camedda – Si faghet oe in Tàtari, a ue aiat tramudadu dae unos binti annos, s’interru de su cumandante Giovanni Camedda. Originàriu de Solanas, su cumandante Camedda fiat nòdidu meda pro is interventos de sucursu a naves in perìgulu, interventos chi dd’aiant fatu otènnere fintzas unas cantas onorifitzèntzias.
Sàbadu, 17 de abrile de su 2021
Antoni Nàtziu Garau
—-
Attività realizzata col contributo della Regione Sardegna – IMPRENTAS 2020-2021. LR 22/2018, art. 22
commenta