Emergèntzia Coronavirus: vatzinos
Su Gazetinu
Aberit oe in Aristanis su tzentru provintziale de is vatzinos. Su tzentru est acasagiadu me in su palasport nou de Sa Rodia. Su fàbbricu, postu a disponimentu dae su Comune e gestidu dae sa Assl, at a èssere abertu dae is 9.00 a is 14.00 e dae is 15.00 a is 20.00. Ddoe sunt 10 postas pro fàghere is vatzinos e, a regime prenu, s’ant a pòdere vatzinare fintzas a 1.500 persones ònnia die. In custa prima simana ant a tzerriare a is persones nàschidas in is annos intra de su 1942 e su 1949 chi si sunt registradas in su Portale regionale de is vatzinos.
In s’interis, eris, pro more ca is vatzinos de sa Pfizer-Biontech sunt ispatzados, sa responsàbile de su Servìtziu de Igiene e Sanidade Pùblica Maria Valentina Marras at fatu a ischire chi is primas doses pro is persones chi tenent 80 o prus in is comunes de Asuni, Sèneghe, Arcidanu, Geroni, Arruinas e Uras, chi si depiant fàghere intra de oe e giòbia, ddas ant suspèndidas pro immoe e ddas ant a torrare a programmare in is dies imbenientes.
Si previdet, imbetzes, pro giòbia e chenàbura sa de duas doses de sa campànnia de vatzinatzione contras de sa Covid-19 pro is chi tenent 80 e prus annos de Crabas.
In fines, sa sìndiga de Arborea Manuela Pintus, regorta sa disponibilidade de is mèigos de base pro fàghere is vatzinos, at dadu sa disponibilidade a sa Assl pro frunire logos e fàbbricos pro sighire sa vatzinatzione in bidda etotu, evitende aici su tramudu a Aristanis de is tzitadinos de Arborea, cumentzende dae is residentes nàschidos intra de su 1942 e su 1951.
Martis, 13 de abrile de su 2021
Antoni Nàtziu Garau
—-
Attività realizzata col contributo della Regione Sardegna – IMPRENTAS 2020-2021. LR 22/2018, art. 22
commenta