Su Gazetinu, 9 de abrile de su 2021
Su Gazetinu
Zona ruja – Sa Sardigna dae lunis 12 de abrile diat pòdere torrare in zona ruja. Custu pro more de s’ìndighe de impestos dae Coronavirus “Rt”, chi nch’est artziadu a subra de 1,25.
Impestos – Creschet ancoras su nùmeru de impestos dae Coronavirus in provìntzia de Aristanis. In Mòguru e in Aristanis ant sinnaladu s’acontèssidu de carchi persone chi nd’at piscadu su Coronavirus sa de duas bortas in un’annu.
Vatzinos – Sos Carabineris de su NAS ant cunsignadu unu raportu a sa Procura de sa Repùblica de Aristanis, chi at a dèpere averiguare si ddoe at irregularidades in su faghimentu de su vatzinu in tzitade dae parte de sa Assl. In s’interis, is sìndigos de unos cantos Comunes domandant a s’Assl prus craresa e s’inditu de tempos seguros.
Donatziones de sàmbene – Oe regorta de sàmbene in Santu Lussurzu, cras in Sèdilo e domìnigu in Mòguru e Biddobrana. Sa campànnia de donatziones dda contivìgiat s’Avis, a manos de pare cun s’Assl.
Chenàbura, 9 de abrile de su 2021
Antoni Nàtziu Garau
—-
Attività realizzata col contributo della Regione Sardegna – IMPRENTAS 2020-2021. LR 22/2018, art. 22
commenta