Sa de duas Pascas Mannas... inserrados. Augùrios a totus! - LinkOristano

Sa de duas Pascas Mannas… inserrados. Augùrios a totus!

Su Gazetinu

Su Gazetinu OK

Sa de duas Pascas Mannas… inserrados. Augùrios a totus!

Augùrios, augùrios dae coro a totus!
Est sa de duas Pascas Mannas chi nche dda passamus inserrados. In sa prima, sa de su 2020, turmentados dae “su babballoti”, fiamus giai contende is mortos meda, gherrende contras de un’inimigu farsu e disconnotu. In custa Pasca Manna, sighimus a contare ònnia die is mortos, tropu mortos, ca s’inimigu est ancoras trasseri, ma a su mancus ddi connoschimus sa cara e amus agatadu sa manera de ddi parare fronte: curas profetosas e su vatzinu, unos cantos vatzinos.

Tzertu, sa suferèntzia est manna: cussa de is malàidos chi gherrant in is ispidales contras de “su babballoti”; cussa de is famìllias de chie in custos 14 meses de pandemia est mortu pro more de su virus o cun su virus; cussa de chie est in prima filera pro curare sa maladia e pro nde firmare s’isparghidura (su personale sanitàriu, is Fortzas de s’òrdine, s’Amparu tzivile, s’Esèrtzitu, is voluntàrios e medas àteras categorias); cussa de chie at pèrdidu su traballu pro ite ca s’economia s’est firmada; cussa de nois – onniunu de nois – chi at pèrdidu unu cantigheddu de libertade e at dèpidu mudare fintzas is avesos de sa vida de ònnia die: nudda istrintas de manu, impràssidos e bàsidos a parentes e amigos, is pitzocheddos chi faghent iscola dae domo etotu, cun su computer o cun su telefoneddu! E nois, de custa suferèntzia, de is istorbos e de s’istrambesa de sa vida nostra pro more de su virus, nde faeddamus ònnia die in is pàginas de LinkOristano.

S’esperièntzia de custos ùrtimos meses de paisos chi sunt prus a in antis de nois in su fàghere is vatzinos nos narat chi a “su babballoti” ddu podimus bìnchere. At a èssere malu a ispèrdere, comente nos narant is iscientziados, ma amus a imparare a bìvere paris cun issu e non nos at a fàghere prus a tìmere. A tènnere passèntzia ancoras un’àtera pariga de meses est e a nos vatzinare, a lestru.
A totus is Augùrios prus bellos dae sa cambarada de LinkOristano, pro chi siat una Pasca Manna sulena, de salude e … de passèntzia.

Antoni Nàtziu Garau

—-

Attività realizzata col contributo della Regione Sardegna – IMPRENTAS 2020-2021. LR 22/2018, art. 22

commenta