Su Gazetinu, 17 de martzu de su 2021
Su Gazetinu
Bosa, isrobu in sa butega de prendas – Si sunt faghende is iscrucullos de lege pro iscobèrrere chie, s’àteru merie, at fatu s’isrobu in sa butega de prendas de Sotgiu in Bosa. Is bandidos fiant tres: unu portaiat una piluca in conca e un’àteru portaiat in manos una bussa de plàstica, comente pro cuare un’arma. Sa Giustìtzia amegat de castiare is immàgines de is sistemas de videucastiamentu.
Bias – Fintzas sa Prefetura at a averiguare ònnia tres meses sa cunditzione de is bias in provìntzia de Aristanis. Sa situatzione est grave meda, pro more ca ddas contivìgiant pagu.
Abbanoa – S’ex assessore comunale de Aristanis Salvatore Ledda, originàriu de Paulle, est intradu in su Consìgiu de amministratzione nou de Abbanoa.
Is Arutas, rena – In Crabas ant torradu ses chilos de rena leados trinta annos a oe dae sa praja de Is Arutas. Non s’at a istentare a nche ddos torrare a ghetare in sa praja dae ue nche dd’aiant pigada, paris cun àtera rena issucutada in custos meses dae s’Àrea marina amparada.
Aristanis, s’Arruga dereta – Dae inoghe a pagu tempus in s’Arruga dereta de Aristanis s’at a pòdere passigiare in mesu de istèrgios de terra. Ddu previdet unu cuncordu chi at bintu su cuncursu bogadu dae su Comune pro avalorare su connotu de sa tzitade. Sa pròpia cosa si diat dèpere fàghere fintzas in bia de De Castro.
Mèrcuris, 17 de martzu de su 2021
commenta