Su Gazetinu, 27 de freàrgiu de su 2021
Su Gazetinu
Coronavirus – Amegat de arribare su Dpcm cun is règulas noas pro firmare sa pandemia e chi nos at a acumpangiare fintzas a su 6 de abrile, est a nàrrere a Pasca Manna. Si previdet sa cunfirma de su proibimentu de essire a su note e de si transire dae una regione a s’àtera, francu pro motivos particulares. Cun sa callentura subra is 37,5 grados no at a fàghere a essire dae domo. Novas bellas, imbetzes, pro tzìnemas e teatros, chi ant a torrare a abèrrere su 27 de martzu. In fines, at a fàghere a retzire istràngios in domo, respetende però is règulas de seguresa.
Vatzinos – Su palatzieddu de s’isport nou de Sa Rodia, in Aristanis, diat pòdere acasagiare is fainas de vatzinatzione contras de su coronavirus. S’amegat de aprofundare custa ipòtesi, mentres ant giai torradu a tzerriare a unos cantos mèigos chi fiant andados in pensione pro ghetare una mau de agiudu in su faghimentu de su vatzinu.
Ispidale – Is sìndigos de sa provìntzia de Aristanis minetzant de si dimìtere, si non ant a agatare solutzione is problemas graves de sa sanidade, comintzende dae cussos de s’ispidale de Santu Martinu in ue ddoe at pagu personale. Eris no at dadu resurtadu bonu s’addòbiu cun is responsàbiles de s’Ares e de s’Assl.
Iscuderias – Sa normativa noa chi diat dèpere pònnere òrdine in sa chistione de is iscuderias de sa Sartìllia dd’ant presentada a sa Cummissione urbanìstica de su Comune de Aristanis. Dda diat dèpere aprovare chida chi benit.
Sàbadu, 27 de freàrgiu de su 2021
commenta