Su Gazetinu, 23 de freàrgiu de su 2021
Su Gazetinu
Aristanis, ispidale – In s’ispidale de Santu Martinu de Aristanis mancat personale meda e custu ddu ponet in arriscu de serrare. Est su chi si leghet in su dossier cuncordadu dae su sindacadu Cimo. Su presidente de sa Cummissione regionale de sa Sanidade, Domenico Gallus, at cunfirmadu is problemas, ma at asseguradu chi s’ispidale no at a serrare. Su consigieri regionale de su Movimentu de is 5 Isteddos Alessandro Solinas at domandadu un’interventu lestru de s’Assessoradu de sa Sanidade.
Coronavirus – In Terraba, in is dies passadas, s’est contadu un’àteru mortu pro more de su coronavirus. Eris in provìntzia de Aristanis un’impestu isceti e unos cantos sanamentos.
Fordongianus – Si transint oru oru de su frùmene Tirsu cara a Busache is chircas de s’abba callente incarreradas dae su Comune de Fordongianus. In is chidas passadas, a unos 200 metros de fungudesa, aiant agatadu una falda chi bogaiat 2 litros de abba a su segundu. In bidda amegant de pensare a fainas noas ligadas a su tènnere a disponimentu s’abba callente.
Botzas – In un’addòbiu fatu in Aristanis, is dirigentes de sa Federatzione de is botzas ant elègidu a su presidente regionale, Gianluca Lilliu. In su Comitadu regionale ddoe est fintzas s’aristanesu Oscar Migliorini.
Martis, 23 de freàrgiu de su 2021
commenta