Su Gazetinu, 16 de freàrgiu de su 2021

Su Gazetinu, 16 de freàrgiu de su 2021

Su Gazetinu

Coronavirus – Dae unas cantas dies in Sardigna su nùmeru de impestos de coronavirus comunicados dae s’Unidade de crisi regionale amegat de ismenguare de sighidu. Eris nde sunt essidos a pìgiu 56 e, de custos, 7 in provìntzia de Aristanis. Una punna chi lassat isperas bellas, mancari su nùmeru de is mortos pòngiat ancoras pistighìngiu. In is ùrtimas 24 oras si sunt contados in Sardigna 6 mortos. Sa pandemia faghet a tìmere ancoras e, pro cussu, est mègius a non fàghere aconcadas e est giustu a annoare is invitos pro tènnere unu cumportamentu prudente e responsàbile.

Pensiones – Un’ordinàntzia noa de s’Amparu tzivile, cunsiderada s’emergèntzia coronavirus, apostìvigat de pagare in antis is pensiones e is indennidades de acumpangiamentu de s’INPS a is invàlidos tziviles.
Is ufìtzios de Poste Italiane ant a pagare in antis, intra de su 23 de freàrgiu e su 1 de martzu, is pensiones e is indennidades de su mese de martzu. Cussas de abrile s’ant a pòdere tirare dae su 26 de martzu a su 1 de abrile, mentras cussas de su mese de maju intras de su 26 de abrile e su 30 de abrile.

Gurfinu – Eris in sa praja de Su Bardoni, in is costeras de Crabas, ant agatadu unu gurfinu giòvanu mortu. Immoe amegant de fàghere averiguaduras pro chircare de cumprèndere pro ite est mortu.

Martis, 16 de freàrgiu de su 2021